text size
Американскиот претседател Доналд Трамп потврди дека украинскиот претседател Володимир Зеленски ќе оди во Вашингтон в петок. Трамп повторно најави дека ќе воведе царини од 25 проценти на автомобили и други производи од Европската Унија. „Енвидија“ (Nvidia) ги објави резултатите од работењето, но тие не ги импресионираа инвеститорите. Фјучерсите на европските акции утрово се тргуваат претежно во зелено.
ПОЛИТИКА
Трамп вети царини за Европа од 25 проценти
Американскиот претседател Доналд Трамп најави дека неговата администрација ќе воведе царини од 25 проценти на автомобили и други производи од Европската Унија. Трамп исто така изјави дека претходно најавените царини за Мексико и за Канада ќе стапат во сила на 2 април. Оваа изјава, според „Блумберг“ (Bloomberg), предизвика одредена конфузија, бидејќи царините за американските соседи требаше да стапат во сила идниот месец.
Зеленски в петок во Вашингтон
Трамп, за време на седницата на неговиот кабинет, потврди дека украинскиот претседател Зеленски ќе допатува во Вашингтон в петок за да потпише нацрт-договор со кој САД ќе добијат пристап до приходите од експлоатација на украинските природни ресурси.
БИЗНИС
„Енвидија“ ги разочара инвеститорите
Акциите на „Енвидија“ (Nvidia) паднаа за два процента во електронското тргување, бидејќи профитот на компанијата не ги импресионира инвеститорите. Имено, американскиот производител на чипови објави добри, но не и одлични квартални бројки, што донекаде ги разочара учесниците на пазарот. „Енвидија“ предупреди дека бруто-профитните маржи ќе бидат пониски од очекуваното, бидејќи брза да претстави нов дизајн на чипот наречен „блеквел“ (Blackwell).
БЕРЗИ
Европа
Фјучерсите на европските акции утрово се тргуваат претежно во зелено, пред објавувањето на податоците за довербата на потрошувачите во еврозоната. Европските берзи и вчерашното тргување го завршија со добивки, бидејќи инвеститорите внимателно ја следеа серијата корпоративни заработки.
САД
И фјучерсите на американските индекси се тргуваат во зелено, пред објавувањето на прелиминарните податоци за БДП на САД за четвртиот квартал. Економистите очекуваат дека економијата пораснала по стапка од 2,3 проценти, по растот од 3,1 процент од претходниот квартал. Потсетуваме дека американските берзи вчерашното тргување го завршија мешано, при што акциите на водечките технолошки компании закрепнаа во очекување на деловните резултати на „Енвидија“. Сепак, акциите на „Енвидија“ паднаа во електронското тргување, бидејќи резултатите ги разочараа инвеститорите.
Азија
Кога станува збор за акциите во азиско-пацифичкиот регион, тие се тргуваат претежно во црвено, откако американскиот претседател Доналд Трамп најави серија нови царини. Потсетуваме, Трамп изјави дека неговата администрација ќе воведе царини од 25 проценти за Европската Унија, како и дека царините за Мексико и за Канада ќе стапат во сила на 2 април.
НАФТА
Нафтата остана стабилна близу најниското ниво годинава, по заканите од царини на американскиот претседател Доналд Трамп и проблемите околу снабдувањето, кои се во фокусот. Нафтата брент се тргуваше под 73 долари за барел откако загуби три проценти во претходните две сесии, додека ВТИ (West Texas Intermediate) беше близу 69 долари.
Трамп рече дека планираните царини против Мексико и Канада „не се откажани“, иако времето на нивното воведување е нејасно. Тој исто така спомена дека царините за Европската Унија сè уште се во игра.
.webp){kind=icon}
