Поради најавените американски царини од 10 проценти на стоката од Кина, втората најголема сила во светот се закани дека ќе возврати со контрамерки. „Ако САД инсистираат да одат по својот пат, Кина ќе се спротивстави со сите неопходни мерки за да ги одбрани своите легитимни права и интереси“, рече портпаролот на кинеското министерство за трговија во петокот. Како одговор на последната рунда царини, ресорното министерство претходно вети дека ќе преземе „соодветни“ чекори, пишува „Блумберг“ (Bloomberg).
ПОЛИТИКА
Трамп воведува дополнителни царини за Кина
Американскиот претседател најави дополнителни царини на кинескиот увоз, што ги зголемува шансите за нови контрамерки од официјален Пекинг. Имено, Трамп во објава на социјалните мрежи напиша дека од 4 март ќе бидат воведени дополнителни царини од 10 проценти на кинеската стока, но и дека истиот ден ќе стапат во сила царините за Канада и за Мексико. Трамп укажа и на постојаниот прилив на фентанил од северот на американскиот континент и наводната улога на Кина во снабдувањето со фентанил.
Зеленски во посета на Вашингтон
Украинскиот претседател Володимир Зеленски ќе пристигне денеска во Вашингтон. Планирано е да потпише договор со Доналд Трамп во Белата куќа, кој ќе им овозможи на САД пристап до украинските минерални ресурси, во замена за воена помош. Пред состанокот со Зеленски, Трамп се сретна со британскиот премиер Кир Стармер и најави повторно започнување на трговските преговори со Велика Британија. Тој разговараше со Стармер и за ситуацијата во Украина, наведувајќи дека САД би можеле да имаат силно присуство во таа земја.
БЕРЗИ
Европа
Фјучерсите на европските акции утрово се тргуваат во црвено. Европските пазари го завршија тргувањето во четвртокот претежно во црвено, откако американскиот претседател повторно се закани со царини од 25 проценти на увозот од Европската Унија.
САД
Фјучерсите на американските индекси исто така се тргуваат со загуби, пред објавувањето на омиленото мерило за инфлацијата на Фед. Економистите очекуваат дека таканаречениот индекс PCE (индекс на трошоци за лична потрошувачка) пораснал за 2,6 проценти во јануари на годишно ниво, што би претставувало најбавно ладење на инфлацијата од јуни минатата година.
Азија
Во азиско-пацифичкиот регион продолжи распродажбата на акции, бидејќи инвеститорите избегнуваат ризични облози поради зголемувањето на царините на Трамп за Кина. Од Сиднеј до Мумбај, берзанските индекси паднаа поради загриженоста дека последната рунда на царини на Трамп за Канада, Мексико и Кина - негативно ќе влијае и на економскиот раст на азиските земји.
Криптовалути
На криптопазарот, биткоинот продолжи да слабее и неговата вредност сега е за 25 проценти пониска во однос на рекордот што беше регистриран пред помалку од шест недели. Па така, биткоинот денеска ослабе за 5,5 проценти, на 79.627 долари во азиското тргување. Потсетуваме дека оваа криптовалута на денот на инаугурацијата на Трамп, 20 јануари, достигна ниво над 109.000 долари, но оттогаш значително ослабе поради загриженоста за планираните царини на Трамп, кои ризикуваат да ја поттикнат инфлацијата.
.webp){kind=icon}
