На глобален геополитички и економски план работите се загреваат и се менуваат побрзо од кога било. Иако САД се мачката во оваа игра на „мачка и глушец“, земјите погодени од одлуките и царините на Трамп не му остануваат должни на американскиот лидер. Најновата вест е дека Канада (повторно) возвраќа на ударот на Трамп во оваа трговска војна. Европската Унија исто така најави одмазда против царините на Трамп за металите.
ПОЛИТИКА
Трамп ја повикува Русија на примирје со Украина
Американскиот претседател изрази надеж дека рускиот лидер Владимир Путин ќе го прифати предложеното примирје во конфликтот со Украина. Трамп рече дека американските преговарачи „моментално“ патуваат во Русија за да се обидат да добијат зелено светло за предлогот за едномесечно примирје, за кое делегациите на САД и Украина разговарале во Саудиска Арабија.
Да потсетиме, Украина пред два дена изјави дека е подготвена да го прифати американскиот предлог за триесетдневно примирје со Русија. Прифаќањето на Зеленски дојде по осумчасовни преговори во Џеда.
Путин ја посети Курската Област
Рускиот претседател во средата ги посети своите трупи во руската област Курск. Носејќи воена униформа, се сретна со високи воени офицери и им издаде наредба на војниците во блиска иднина конечно да го поразат непријателот и целосно да го ослободат тој регион.
Трговска војна меѓу Европа и Америка
Во рамките на понатамошна ескалација на трговскиот конфликт, американскиот претседател најави дека САД ќе одговорат на контрацарините што Европската Унија ги воведе кон Вашингтон. Да потсетиме, САД во средата воведоа царини од 25 проценти на увозот на челик и алуминиум, по што Унијата најави контрацарини на американска стока од 1 април, во вредност од 26 милијарди евра.
Во првите неколку недели на функцијата, Трамп воведе царини на увоз на стока во вредност од 1,4 трилион долари. Компаниите низ светот се подготвуваат за најлошото поради ескалацијата на царинската војна на Трамп, поради што многу од нив веќе формираа работни групи за да ги ублажат негативните последици врз продажбата, профитот и пазарниот удел.
БЕРЗИ
Европа
Фјучерсите на европските акции во утрово се тргуваат претежно со добивки, пред објавувањето на најновите податоци за индустриското производство во еврозоната. Да потсетиме, европските берзи и тргувањето во средата го завршија со добивки, иако глобалните пазари на капитал се на своевиден ролеркостер, поради неизвесноста околу трговската политика на Трамп.
САД
Истовремено, фјучерсите на американските акции се тргуваат мешано, откако најновите податоци укажаа на посилно ладење на инфлацијата од очекуваното. Па така, годишната инфлација во Америка во февруари забави на 2,8 проценти, што е пониско во однос на очекуваните 2,9 проценти. Забавувањето на растот на цените е позитивен сигнал, со оглед на тоа што царините на Трамп би можеле да ги зголемат трошоците за американските домаќинства.
Азија
Кога станува збор за акциите во азиско-пацифичкиот регион, тие претежно се во црвено. Единствен исклучок се јапонските акции, кои пораснаа откако гувернерот на Централната банка на Јапонија изјави дека очекува раст на реалните плати и личната потрошувачка.
.webp){kind=icon}
