Понуди за помош и пораки со сочувство по големата трагедија во Кочани

Соседните земји нудат помош за третирање на повредените од големиот пожар кој синоќа избувна во дискотека во Кочани. Според министерот за здравство Арбен Таравари во македонските болници се згрижени 153 лица, а помош е понудена од Белград и Софија.

Претседателката на Република Македонија Гордана Силјановска-Давкова пред малку во изјава пред една од болниците каде се згрижуваат повредените во Скопје рече дека земјава добива понуди за помош од соседните земји.

Преку телеграма потпишана од кардиналот државен секретар Пјетро Паролин, Папата Франциск упати порака на сочувство по пожарот во ноќен клуб во Северна Македонија, во кој животот го загубија речиси 60 лица, претежно млади луѓе.

Папата изрази „длабоко сочувство до семејствата на жртвите“, како и „својата духовна блискост со повредените“, се наведува во телеграмата упатена до скопскиот бискуп Киро Стојанов. Тој исто така увери дека сеќавањето на жртвите ќе го задржи во своите молитви

И Советот на амбасадори изрази сочувство до семејствата и блиските на загинатите во трагедијата во Кочани. 

„По повод големата трагедија, којашто се случи утрово, по избувнувањето пожар во дискотека во Кочани, во која животот го загубија 59 младинци, членовите на Советот на амбасадори на Македонија обземени со тага изразуваме длабоко сочуство до родителите, роднините, другарите и пријателите на жртвите. Останавме неми пред оваа трагедија што се случи кај нашите сограѓани од Кочани и целата држава. Се молиме за душите на починатите и побрзо оздравување на повредените“, стои во соопштението од Советот на Амбасадори на Северна Македонија.

Албанскиот претседателот Бајрам Бегај изрази сочувство по повод трагичната несреќа што се случи во дискотека во Кочани во која загинаа над 50 лица, а стотици се повредени.

„Моето искрено и длабоко сочувство до семејствата кои ги загубија своите најблиски и до сите граѓани во нашата соседна пријателска земја. Моите молитви и молитвите на албанскиот народ се упатени кон повредените, тие брзо да закрепнат и болката во градот Кочани да не се зголемува“, напиша Бегај во објава на Х.

Претседателот на Украина, Володимир Зеленски и украинското државно раководство упатија пораки со сочувство по повод трагедијата во Кочани во која во пожар во дискотека загинаа над 50 млади лица, а повеќе од 100 се повредени.

„Трагична вест за смртоносен пожар во Кочани. Моето сочувство до семејствата и најблиските на загинатите, до претседателката Гордана Силјановска-Давкова и до народот на Северна Македонија. На повредените им посакувам брзо закрепнување. Украина ја споделува тагата со нашите македонски пријатели на овој тажен ден, напиша украинскиот претседател Володимир Зеленски.

Сочувство за загубените животи и подготвеноста на Грција да помогне по трагедијата во Кочани, изрази грчкиот премиер Кирјакос Мицотакис преку платформата „Икс“.

„Искрено сочувство до народот на Северна Македонија за загубените животи во трагичниот пожар во Кочани. Моите мисли се со жртвите и нивните семејства, а на повредените им посакувам брзо закрепнување. Грција е подготвена да помогне во ова тешко време“, напиша Мицотакис, според „Катимерини“.

Сочувство и понуда за помош на социјалната мрежа Х изрази српскиот претседател Александар Вучиќ. Владата на Србија објави дека ќе прогласи ден на жалост во вторник 18 март.

„Со голема тага ја примив веста за страшната трагедија што ја снајде Македонија. Изразувам длабоко сочувство до семејствата на загинатите во пожарот во дискотеката во Кочани, како и солидарност со народот на Македонија во овие тешки моменти. Нашите мисли се со сите оние кои ги загубија своите најблиски и со оние кои се борат за своите животи. Србија е секогаш подготвена да ја пружи секаква неопходна помош, во согласност со своите можности, покрај своите пријатели“, објави Вучиќ.

Во статус на социјалните мрежи помош понуди и Бојко Борисов, поранешниот бугарски премиер. Тој имал телефонски разговор со премиерот Мицкоски и изразил најискрено сочувство до роднините на загинатите во пожарот во дискотека во градот Кочани.

„Во најтешките моменти остануваме заедно и затоа на колегата му ја понудив помошта што Бугарија може да ја пружи. Господ да ги прости починатите. Се молиме за побрзо закрепнување на повредените“, напиша Борисов.

Амбасадорката на САД Ангела Агелер изрази сочувство на семејствата на настраданите во пожарот во дискотеката „Пулс“ во Кочани, а на премиерот Мицкоски му понуди помош.

„Срцето ми се кине за многуте жртви во синоќешниот пожар во ноќен клуб во Кочани. Нашето најдлабоко сочувство за жртвите и нивните најблиски во ова страшно време, а на повредените им посакуваме брзо закрепнување. Загубата на толку многу млади животи во една заедница е страшна трагедија. На премиерот Христијан Мицкоски му понудив помош и сите ресурси на Амбасадата на САД, како и нашите молитви за сите оние кои страдаат денес“, напиша Агелер.

Сочувство стаса и од премиерот на Хрватска Андреј Пленковиќ кој утрово разговарал со премиерот Христијан Мицкоски.

„Длабоко сме шокирани и искрено жалиме за страшната трагедија во Кочани во која беа скратени бројни млади животи. Во овие моменти на неискажлива тага, Хрватска стои со Северна Македонија. Во име на Владата на Република Хрватска и во мое лично име, изразувам длабоко сочувство до вас, македонскиот народ, а пред се до семејствата и пријателите на жртвите. На повредените им посакувам брзо и успешно закрепнување“, стои во објавата на Пленковиќ.

Сочувство изрази и еврокомесарката за проширување Марта Кос. Изразувајќи сочувство за загинатите, Кос наведува дека нејзините мисли се „со жртвите, нивните најблиски и целата заедница за време на оваа страшна трагедија!“

„Длабоко натажени од трагичниот пожар во Кочани, Северна Македонија, кој однесе животи на премногу млади луѓе, наведе Кос во објава на Икс.

Откажани сите настани

По трагедијата во Кочани во која загинаа над 50 млади луѓе откажани се сите настани во земјава.

Денеска требаше да се одржат избори за претседател на најголемата опозициска партија СДСМ, а Централната изборна комисија утрово донесе одлука за одложување на внатрепартиските избори за претседател

„Поради огромната трагедија што се случи во Кочани, СДСМ ги одложи внатрепартиските избори за претседател на партијата. Општинските организации на СДСМ ќе се вклучат во помошта за настраданите во пожарот. Изразуваме длабоко сочувство до семејствата, роднините и пријателите на загинатите во огромната трагедија што се случи во Кочани. На повредените им посакуваме брзо и целосно закрепнување. Во овие тешки моменти, нашите мисли и молитви се со сите засегнати од оваа страшна несреќа“

Фудбалската федерација на Македонија (ФФМ) ги одложи денешните натпревари во сите конкуренции заради трагедијата која се случи во нашата земја во Кочани.

„Длабоко сме потресени од трагичната несреќа во Кочани во која настрадаа многу млади луѓе. Во овие тешки моменти, нашите мисли и молитви се со семејствата и блиските на настраданите. Изразуваме најискрено сочувство и поддршка“, објавија од ФФМ.

Сочувство и барања за одговорност

Со длабока тага ја примив веста за страшната трагедија во Кочани. Ова е тежок и многу тажен ден за Македонија! Загубата на толку многу млади животи е ненадоместлива, а болката на семејствата, на најблиските и пријателите е неизмерна, пишува на Фејсбук премиерот Христијан Мицкоски.

„Во овие моменти на длабока тага, нашите мисли се со оние што ги загубија своите сакани. На повредените им посакувам брзо закрепнување, а на семејствата на загинатите – сила да ја издржат оваа незамислива загуба. Народот и Владата ќе направат сè што е во нивна можност барем малку да ја ублажат нивната болка и да им помогнат во овие најтешки мигови. Ги повикувам сите надлежни институции – здравствените служби, полицијата, локалните власти – да преземат итни мерки за помош на повредените и поддршка на погодените семејства. Владата е целосно мобилизирана и ќе направи сè што е потребно за справување со последиците и утврдување на причините за оваа трагедија“, напиша Мицкоски.

„Во овој момент на длабока тага, сакам да изразам најискрено сочувство до семејствата кои изгубија најблиски и да им посакам брзо закрепнување на повредените. Во вакви моменти, единствено што е важно е солидарноста и поддршката.

Ги повикувам сите институции, здравствените работници, но и целото општество да се обединиме во помошта за настраданите и нивните семејства. Како лекар, стојам на располагање за секој вид помош што можам да ја дадам во оваа тешка ситуација.

Сега не е време за поделби, туку за обединување во тагата и во напорите да помогнеме“, напиша лидерот на опозициската СДСМ, Венко Филипче.

И политичките партии и функционери се огласуваат по повод големата трагедија во Кочани.

„Профитот и корупцијата повторно го зедоа данокот, овој пат во млади животи. Додека сме во најтешкото исчекување за крајната бројка на жртви и повредени, прашуваме кој дозволил да се пушти објект во употреба доколку немал соодветни услови за тоа и продал повеќе билети од дозволениот капацитет на локалот? Дали некој не извлекол поука од сите претходни слични и трагични ситуации како оваа и дозволил ова да се случи, за на крајот цела земја да биде во жалење и сите да бараме одговори како дошло до тоа“, стои во соопштението од ЛДП.

Министерот за правда Игор Филков изрази сочувство за десетиците млади животи кои загинаа во пожар во дискотека во Кочани и најави одговорност за сите инволвирани во оваа трагедија.

„Десетици млади животи згаснаа во пожар што никогаш не смееше да се случи. Ова не е само трагедија – ова е аларм што бара одговорност! Нема зборови за оваа болка … но мора да има правда! Секој што потфрлил – ќе одговара! Ова не смее да се повтори никогаш повеќе! Нека почиваат во мир овие млади души“, вели Игор Филков, министер за правда.

Текстот постојано се ажурира со изрази на сочувство и понуди за помош

Во моментов нема коментари за веста. Биди прв да коментира...

Остави коментар