Бројот на повредени од Кочани што се лекуваат во странство надмина 70 лица

Вкупно 72 пациентa од пожарот во клубот „Пулс“ во Кочани се лекуваат надвор од државата, откако во текот на вчерашниот ден беа испратени уште 21 пациент. Во Скопје на лекување остануваат 98 пациенти. 

Во текот на вчерашниот ден, според информациите од Министерство за здравство, пациентите се распределени по здравствените установи низ земјата, и тоа на Клиничкиот центар во Скопје – 52 пациентa, во ГОБ „8 Септември“ – 17 пациенти, во универзитетската клиника „Св. Наум Охридски“ – 12 пациенти, во Клиниката за токсикологија – 10 пациенти, во „Аџибадем Систина“ – 7 пациенти. 

Надвор од државата во текот на вчерашниот ден на лекување биле упатени 21 пациент, и тоа во Литванија – 4 пациенти, Австрија – 2 пациенти, Словенија – 2 пациенти, Република Србија – 12 пациенти и во Република Бугарија – 1 пациент.

Министерот за здравство Арбен Таравари вчера информира дека пациентите генерално се во стабилна состојба, освен 20 пациенти, за кои рече дека се во критична состојба, притоа нагласи дека сите пациенти што биле во Кочани и во Штип се сместени во Скопје за третман на ниво на терцијарно здравство. 

Министерот испрати апел до сите што присуствувале на трагичниот настан во Кочани, во кој загинаа 59 лица, а не се пријавиле на лекар, да се пријават кај нивните матични лекари во болниците во Кочани или во Штип или, пак, во трите болници во Скопје.

Во моментов нема коментари за веста. Биди прв да коментира...

Остави коментар