Астронаути на НАСА се вратија на Земјата откако со месеци беа заглавени во вселената

Двајца астронаути на НАСА што поминаа девет месеци во орбитата конечно се вратија на Земјата во капсула на компанијата „Спејс екс“ (SpaceX). Со тоа заврши сагата што привлече меѓународно внимание и сведочеше за значајната зависност на Америка од компанијата на Илон Маск.

Буч Вилмор и Суни Вилијамс, сместени во капсулата „Драгон“ (Dragon), заедно со уште двајца членови на екипажот од НАСА, Ник Хејг и рускиот космонаут Александар Горбунов, слетаа на Земјата со падобрани и пристигнаа на брегот на Флорида во вторникот околу 18 часот по њујоршко време.

„И, слетување, екипажот девет повторно е на Земјата!“, рече Сандра Џонс од НАСА за време на директниот пренос, додека од контролата на мисијата на „Спејс екс“ се слушаа аплаузи и извици.

Екипите во чамци веднаш потоа се упатија да извршат безбедносни проверки на капсулата, која плуташе по мирниот океан, веднаш до јато делфини. Подоцна капсулата беше подигната на специјален брод „за закрепнување“, а астронаутите почнаа да излегуваат од капсулата еден по еден - директниот пренос на „Спејс екс“ го следеа околу 2,4 милиони гледачи.

Вилијамс и Вилмор се сместија на носилки за стандардни медицински проверки, поздравувајќи и мавтајќи. Ако сè биде во ред, ќе им биде дозволено да летаат за Хјустон и повторно да се сретнат со своите семејства.

„Сè помина беспрекорно“, рече на прес-конференција Стив Стич, менаџер на НАСА.

Патувањето на познатата двојка означува шести најдолг континуиран престој меѓу астронаутите на НАСА, во рамките на Меѓународната вселенска станица (англ. International Space Station / ISS), според податоците од веб-страницата на агенцијата. Што се однесува до американските астронаути, Суни Вилијамс сега го бележи вториот најдолг престој во вселената, со вкупно 608 дена. Исто така, таа го држи рекордот за вкупно време поминато во вселенски прошетки меѓу астронаутките.

Вилмор и Вилијамс пристигнаа на Меѓународната вселенска станица минатиот јуни со вселенски брод на компанијата „Боинг“, со планови да поминат околу една недела во вселената. Меѓутоа, тој краток престој се претвори во приближно девет месеци, кога НАСА во август одлучи двојката да се врати на Земјата во капсула на „Спејс екс“, поради технички проблеми со леталото на „Боинг“.

Нивната сага стана меѓународен спектакл, а некои медиуми ги нарекоа „заглавени“ астронаути, алудирајќи на неподготвеноста на НАСА да ги врати назад во нивниот оригинален вселенски брод. Таа непријатна ситуација го доведе во лоша положба борбениот вселенски сектор на „Боинг“, откако компанијата беше потресена од серија кризни настани, што потоа доведе до промени во врвот на менаџментот.

„Боинг“ е „многу посветен“ на својот брод „Старлајнер“ (Starliner) и работи „рака под рака“ со агенцијата на неговата сертификација, рече Стич. Овие изјави доаѓаат откако „Блумберг“ извести дека американскиот производител на авиони разгледува опции за програмата што не е финансиски одржлива, додека извршниот директор Кели Ортберг се обидува да го намали портфолиото на компанијата.

Претставник на „Боинг“ одби да даде коментар.

 

Во исто време нивната приказна откри колку НАСА стана зависна од „Спејс екс“, во обид да ги спроведе главните програми за патување на луѓе во вселената.

Продолжениот престој на астронаутите во орбитата исто така предизвика политички поентирања на највисоките нивоа на американската влада. Претседателот Доналд Трамп ја обвини администрацијата на поранешниот претседател Џо Бајден дека практично ги „оставила“. Маск, извршниот директор на „Спејс екс“, тврди дека тимот на Бајден ги оставил астронаутите во вселената од политички причини. Претставниците на НАСА и „Спејс екс“ не сакаа да ја потврдат изјавата на Маск за време на прес-конференција месецов.

Стич рече дека НАСА разгледала низа опции и соработувала со „Спејс екс“ за да дојде до најдобриот начин астронаутите да бидат вратени на Земјата. Таа ситуација предизвика и посебен интерес во Индија, земјата со која Вилијамс е поврзана, а која има амбициозна вселенска програма. Во Џхуласану, родното село на нејзиниот татко во индиската држава Гуџарат, верниците во хиндуистичкиот храм и децата во локалното училиште го поминаа поголемиот дел од понеделникот и вторникот молејќи се за безбедно враќање на Суни Вилијамс.

Во моментов нема коментари за веста. Биди прв да коментира...

Остави коментар