Накратко од светот: Трамп деновиве ќе објави царини за увоз на автомобили

Американскиот претседател Доналд Трамп изјави дека во наредните денови ќе објави царини за увозот на автомобили, како и дека одредени земји ќе бидат изземени од „реципрочните“ царини што стапуваат во сила следната недела. Трамп исто така најави дека наскоро ќе стапат во сила и царини на дрвната граѓа и полупроводниците, но не даде детални објаснувања. Тој ја повтори и својата закана за воведување царини на фармацевтските производи. Потсетуваме дека Трамп претходно, на социјалните мрежи, најави дека ќе ѝ наплаќа царини од 25 проценти на секоја земја што купува нафта од Венецуела.

Белата куќа по грешка откри воен план 

Во јавноста протече преписка меѓу највисоките американски функционери со која се открива план за напад на јеменската милитантна група Хути, но и нивниот презир кон европските сојузници. Воените планови беа споделени во група за размена на пораки во која по грешка бил вклучен и уредникот на американскиот портал „Атлантик“. Во дијалогот, наводно, учествувале и потпретседателот на САД, Џеј Ди Венс, и министерот за одбрана Пит Хегсет. Венс за време на комуникацијата наводно рекол дека „мрази што Европа повторно треба да се извлекува од неволја“, на што Хегсет одговорил дека „го дели неговото гадење кон патетичното ’шлепање’ на Европејците“.

Стабилизација на турската лира и пазарот на акции 

Турскиот министер за финансии Мехмет Симсек денеска ќе разговара со меѓународните инвеститори, откако апсењето на градоначалникот на Истанбул, Екрем Имамоглу, предизвика протести во земјата и доведе до пад на турската лира. Министерот за финансии ќе се обиде да ги смири инвеститорите и да ги увери дека ќе ги задржи политиките поволни за инвеститорите.

Bloomberg

 

БЕРЗИ

Европа

Фјучерсите на европските акции утрово се тргуваат претежно во црвено. Европските акции и вчерашното тргување го завршија со загуби, бидејќи избледе првичниот оптимизам во врска со американските царини. Потсетуваме дека „Волстрит журнал“ (Wall Street Journal) за време на викендот извести дека новите царини на американскиот претседател Доналд Трамп, кои планира да ги воведе од 2 април, ќе бидат поумерени отколку претходните и дека одредени земји ќе бидат изземени.

САД

И фјучерсите на американските индекси се тргуваат претежно во црвено, бидејќи новите царини на Трамп веројатно дополнително ќе ѝ наштетат на американската економија. Претседателот на Фед во Атланта, Рафаел Бостик, изјави дека зголемувањето на царините ќе го загрози напредокот во намалувањето на инфлацијата и дека годинава очекува само едно намалување на каматните стапки.

Азија

Кога станува збор за акциите во азиско-пацифичкиот регион, тие се тргуваат мешано. Акциите во Јапонија предничат по добивките, додека кинеските претежно се во црвено. Истовремено, главниот индекс на кинеските технолошки акции во Хонгконг падна за 3,8 проценти, најмногу за три недели, а меѓу најголемите губитници се „Алибаба“ (Alibaba Group) и „Шаоми“ (Xiaomi).