Во наредата епизода од тековната 36-та сезона на култната анимирана серија „Симпсонови“ (The Simpsons), што ќе се емитува в недела, на 27 април, ќе се појави првиот македонски лик во историјата на шоуто - спортист од Македонија кој пристигнува во Спрингфилд како вистинска сензација.
Иако станува збор за измислен лик, тој симболично го претставува македонскиот дух - иронично, преку бејзбол, како „најпопуларeн и најисконски македонски спорт“.
Во реализацијата на оваа епизода учествува македонското семејство Нешкоски: Невена, нејзиниот брат Наум и сестрата Калина, кои заедно го водат едукативниот детски канал „Дарко Биберко“.
Веста во објава на социјалните мрежи ја сподели токму Невена, која објасни дека имале активна улога во процесот – од превод на содржината, до пеење песна што ја адаптирале од англиски на македонски јазик. Невена имала и консултантска улога во креативниот процес.
Најновата епизода на „Симпсонови“ ќе се емитува во 20 часот по источноамериканско време, односно в понеделник во два наутро по македонско.
Во кратката најава за епизодата на филмскиот сајт ИМДБ (IMDb) се раскажува дека во оваа епизода дедо Симпсон и Мо Шислак се здружуваат за необичен потфат. Тие регрутираат талентиран бејзбол играч од Македонија да се придружи на локален бејзбол тим во Спрингфилд.
Во моментов, „Симпсонови“ ја емитуваат својата 36-та сезона, која започна на 29 септември 2024 година. До 22 април годинава, емитувани се вкупно 786 епизоди од анимираната серија. Тековната сезона е дел од новиот договор на „Фокс“ (FOX) и „Дизни“ (Disney), со кој серијата беше обновена за уште четири сезони, до 2029 година, што значи дека ќе достигне до 40-та сезона.
.webp){kind=icon}
