Српскиот претседател, Александар Вучиќ, е на пат кон Белград откако синоќа нагло му се слошило за време на официјалната посета на САД, јавуваат српските медиуми. По побарана медицинска помош и извршен преглед, донесена е одлука тој итно да се врати во Србија.
Како што пренесува „Танјуг“, на Вучиќ му се слошило во попладневните часови по локално време, додека се подготвувал за наредните состаноци, а по средбата со конгресменката Клаудија Тени, Род Благојевиќ и српски претприемачи.
Во моментот кога му се слошило, со него биле министерот за финансии Синиша Мали и медиумската советничка Сузана Васиљевиќ.
Како последица на нарушената здравствена состојба, Вучиќ нема да присуствува на главните настани поради кои престојуваше во САД, меѓу кои и планираната кратка средба со американскиот претседател Доналд Трамп.
Неизвесна е и планираната посета на Москва на 9 мај, иако Вучиќ претходно изјави дека „во никој случај нема да се откаже од неа“, пренесува агенцијата „Бета“.
Српскиот претседател попладнево пристигнал во Белград, а веднаш од аеродромот бил префрлен на Воено-медицинската академија (ВМА).
Вучиќ на ВМА бил пречекан од министерот за здравство Златибор Лончар и доктор Драган Динчиќ, објави „Танјуг“.
Министерот Лончар и доктор Динчиќ попладнево одржаа прес-конференција на која ја објаснија состојбата на српскиот претседател Александар Вучиќ, откако беше примен на ВМА.
„Со години учествувам во следењето на третманот на претседателот. Во последните 10 години, тој имал слични проблеми во три наврати, поврзани со висок крвен притисок. За време на престојот во Америка, тој почувствувал болка во градите, која била силна и траела кратко време. Тој земаше дополнителна терапија која беше доста интензивна. Крвниот притисок во САД бил значително повисок од оној измерен во овој момент. Спротивно на нивниот предлог, претседателот одлучи да се врати во земјата со авион. Тој денес околу 13 часот пристигна во Воено-медицинската академија и немаше никакви проблеми, се чувствуваше добро“, изјави доктор Динчиќ.
Ажурирано со изјава од доктор Драган Динчиќ
.webp){kind=icon}
