Накратко од светот - цените на нафтата растат, европските фјучерси се претежно во зелено

Цената на нафтата скокна откако Си-ен-ен (CNN) објави дека американските разузнавачки податоци покажуваат дека Израел се подготвува да ги нападне иранските нуклеарни постројки.

Си-ен-ен пренесе дека сè уште не е донесена конечна одлука во врска со нападот. Цената на нафтата брент порасна над 66 долари за барел, додека на ВТИ (West Texas Intermediate) порасна дури за 3,5 отсто пред да ги изгуби добивките. Да потсетиме, цената на нафтата се движи нестабилно од минатата недела, следејќи ги случувањата околу иранско-американските нуклеарни преговори.

Доколку Америка и Иран постигнат договор, на пазарот би можеле да се појават дополнителни барели нафта, што би довело до прекумерна понуда. Сепак, доколку Израел го нападне Иран, тоа би ги прекинало преговорите и би донело нови тензии на Блискиот Исток. Пред само неколку дена цената на нафтата опадна кога Иран најави дека е подготвен за нуклеарен договор.

ЕКОНОМИЈА

Фед мора да биде трпелив

Две функционерки од Федералните резерви нагласија дека Централната банка на САД мора да биде трпелива и внимателно да ги анализира податоците пред да ја приспособи монетарната политика, во време кога економијата се соочува со зголемена неизвесност.

„Фед треба да остане во ‘централна позиција’, а потоа да биде подготвен да дејствува агилно - но не нагло или пребрзо“, рече претседателката на Фед од Сан Франциско, Мери Дејли.

Претседателката на Фед од Кливленд, Бет Хамак, порача дека во моментов најдобриот потег што може да го направи Фед е да „седи со скрстени раце“ и внимателно да ги анализира податоците.

БЕРЗИ

Европа

Следува преглед на состојбата на глобалните пазари на капитал. Европските фјучерси главно се тргуваат во зелено. Меѓу валутите, швајцарскиот франк - кој важи за безбедно засолниште за инвеститорите - зајакна поради растот на тензиите на Блискиот Исток. Да потсетиме, европските берзи вчерашното тргување го завршија со добивки, поттикнати од обложувањата на некои стратези од Волстрит дека европските акции ќе имаат подобри перформанси од американските.

Америка

Истовремено фјучерсите на американските индекси се тргуваат во црвено по веста дека Израел би можел да ги нападне иранските нуклеарни постројки, додека трговците се загрижени за стабилноста на американската економија. Трговците предвидуваат дека долгорочните приноси на државните обврзници ќе пораснат поради загриженоста за растечкиот јавен долг и буџетскиот дефицит на САД.

Depositphotos

Сепак, компании како „Енвидија“ (Nvidia) би можеле да изгубат милијарди долари. Извршниот директор на компанијата Џенсен Хуанг ја повика американската влада да ги ублажи ограничувањата за извоз на технологии за вештачка интелигенција во Кина, предупредувајќи дека во спротивно американските компании ќе изгубат милијарди долари приходи поради конкуренцијата од компании како „Хуавеј“ (Huawei). Хуанг тврди дека Кина претставува можност вредна 50 милијарди долари до 2026 година и дека доколку на американските доставувачи на технологии не им биде дозволено да влезат на тој пазар, локалните купувачи ќе ги потрошат тие пари на друго место.

Азија

Кога станува збор за акциите во азиско-пацифичкиот регион, со нив се тргува претежно во зелено. Акциите во Хонгконг и континентална Кина пораснаа за повеќе од половина процент, додека јапонските акции бележат пад откако податоците покажаа дека извозот забавил втор месец по ред поради американските царини на увозот.