Европската Унија најави забрзување на трговските преговори со САД за да се избегне трговска војна. Германија ѝ даде одобрение на Украина да користи сојузничко оружје за напад на руска територија. „Волво“ (Volvo) планира да го намали бројот на вработени и да укине 3.000 работни места. На европските берзи, тргувањето со фјучерси утрово е мешано.
ПОЛИТИКА
Нападот во Ливерпул „не е терористички чин“
Педесет и тригодишен маж е во притвор откако влетал во толпа навивачи и минувачи што биле собрани на улиците на Ливерпул поради натпревар од Премиерлигата. Повредени се повеќе од 45 лица, меѓу кои и едно дете. Се верува дека напаѓачот дејствувал сам, па нападот не се третира како терористички чин, соопшти полицијата.
Мерц ѝ даде зелено светло на Украина
Германскиот канцелар Фридрих Мерц ѝ даде зелено светло на Украина да користи оружје од сојузниците за напади длабоко во руска територија. „Нема ограничувања во дострелот кога станува збор за оружјето што ѝ го испорачавме на Украина – ние, Британија, Франција или САД“, изјави Мерц на прес-конференција во понеделникот.
Изјавата доаѓа во контекст на засилениот притисок врз Москва, која од страна на Брисел и Вашингтон се обвинува за одолжување на мировните преговори, како и по најголемиот руски напад со дронови од почетокот на војната.
Bloomberg
Москва ги отфрли критиките од Вашингтон
Москва ги отфрли критиките на американскиот претседател Доналд Трамп кон Владимир Путин, нарекувајќи ги неговите изјави „емотивна реакција“. „Почетокот на преговорите во кои Америка вложи големи напори е значајно достигнување и навистина сме му благодарни на претседателот Трамп“, изјави портпаролот на Путин, Дмитриј Песков.
Да потсетиме, Трамп изјави дека размислува за нов пакет санкции против Русија и го нарече Путин „апсолутно луд поради непотребното убивање луѓе“ по последните ракетни и дронски напади врз Украина.
ЕКОНОМИЈА
ЕУ сака да избегне трговска војна со САД
Европската Унија најави забрзување на трговските преговори со САД за да се избегне трансатлантска трговска војна. „Имаме нов поттик за преговорите“, изјави портпаролката на Европската комисија еден ден по телефонскиот разговор меѓу претседателката на комисијата Урсула фон дер Лајен и американскиот претседател Доналд Трамп. Да потсетиме, минатата недела Трамп го критикуваше блокот за одолжување на преговорите и се закани со нови царини од 50 проценти, кои би стапиле во сила на 9 јули.
КОМПАНИИ
„Фолксваген“
Германски суд осуди четворица поранешни раководители на „Фолксваген“ (Volkswagen) за организирана измама во скандалот со манипулација на уредите за контрола на емисијата на штетни гасови. Скандалот се случи во 2015 година, кога американската агенција за заштита на животната средина ја информира јавноста дека „Фолксваген“ манипулирал со софтверот за контрола на моторите за да прикаже пониски емисии. Двајца инженери, Јенс Хадлер и Хано Јелден, добија затворски казни, додека раководителот Хајнц Јакоб Нојсер и понискиот раководител Торстен Д. добија условни казни.
Bloomberg
БЕРЗИ
Европа
На европските берзи тргувањето со фјучерси утрово е мешано, со пад од 0,2 проценти на референтниот паневропски индекс Stoxx 600. Фјучерсите на францускиот CAC40 и британскиот FTSE100 се во пораст, додека германскиот DAX бележи загуби.
Еврото е во мал пад во однос на доларот, но претседателката на Европската централна банка (ЕЦБ), Кристин Лагард, во трговската неизвесност гледа можност за зајакнување на европската валута и нејзино позиционирање како чувар на вредноста и сигурно прибежиште.
Bloomberg
САД
Со американските фјучерси утрово се тргува во зелено, по вчерашната пауза поради празник. Доларот продолжи да паѓа трет ден по ред и се приближува до најниското ниво од јули 2023 година, со вкупен пад од 7 проценти од почетокот на годината поради сè поголемата трговска неизвесност.
Инвеститорите се подготвуваат за нови податоци за индексот на лична потрошувачка – индикатор што Федералните резерви (Фед) внимателно го следат – а се очекува зголемување од 0,1 процент во април.
Азија
Индексот на азиските валути се искачи на највисоко ниво од октомври, а Народната банка на Кина побара од најголемите кредитори да го зголемат уделот на јуанот во прекуграничната трговија, како дел од напорите за заштита од царини и трговска неизвесност. Азиските берзански индекси денеска флуктуираат, со добивки во Јапонија и загуби на акциите во Хонгконг и континентална Кина.
.webp){kind=icon}
