text size
Српските студенти во блокада во сабота организираат тричасовен протест во Белград под слоганот „Ќе се видиме на Видовден“, кој, според најавите, ќе започне во 18 часот на „Славија“. Настанот доаѓа по низа слични акции што ги организираа низ цела Србија во изминатите месеци, откако се случи трагедијата во Нови Сад, кога при паѓање на покривната конструкција на железничката станица загинаа 16 лица.
Студентите најавија дека на протестот во главниот град ќе делат флаери со QR-код кој води до нивната анкета, преку која, како што велат, сакаат да ги вклучат сите кои изминатите седум месеци им давале поддршка.
„Како што веќе најавивме, студентите бараат избори и планираат да учествуваат на нив. Не гледаме друг излез од ситуацијата и начин ова општество да се ослободи. Станува збор за голем потфат кој бара мобилизација на сите наши ресурси, но и помош од граѓаните“, се вели во соопштението на студентите во блокада.
Две нови барања до Владата
Оваа недела, студентите испратија отворено писмо до Владата на Србија со две нови барања, за кои бараат исполнување до сабота во 21 часот.
Првото барање е Владата да упати образложен предлог до претседателот за распуштање на Народното собрание, со цел распишување вонредни парламентарни избори. Второто барање е тоа тело да апелира до Министерството за внатрешни работи да го прекине собирот во Пионирскиот парк и на Плоштадот Никола Пашиќ.
Имено, во кампот на студентите кои организираат контра-собири велејќи дека се против блокадите и сакаат да учат, во споменатиот Пионирски парк, претходно беше најавено поставување мала бина и одржување книжевна вечер токму во сабота.
Реакции од државниот врв: „Ултиматумот не е прифатен“
Еден ден пред најавениот протест, претседателот на Србија, Александар Вучиќ, изјави дека „Србија не прифаќа ултиматум“.
„Српската држава многу пати била подложена на ултиматуми од големи странски сили. И овојпат тие ни го пренесоа ултиматумот преку домашни извршители. Одговорот на српската држава отсекогаш бил ист. Србија не е шака жито. Ултиматумот не е прифатен, не мора да чекате до утре во 21 часот“, рече Вучиќ во петокот.
Тој нагласи дека властите биле подготвени да разговараат со сите, но тоа било протолкувано како слабост. „Бевме подготвени да разговараме со сите. Го чуваме мирот дури и кога се крши законот. Но некој помисли дека тоа значи дека сме слаби, дека се плашиме.“
Првиот потпретседател на владата и министер за финансии, Синиша Мали, во петокот изјави дека протестот во Белград е неуставен и незаконски бидејќи не е пријавен во надлежните институции. За „ТВ Пинк“ рече дека токму поради тоа не се знае каде и кога ќе се одржи, по која траса ќе се движи – ако воопшто има марш – ниту кој ќе сноси одговорност ако нешто се случи.
Воедно, Вишото јавно обвинителство во Белград апелираше до учесниците на собирот да се воздржат од секаков облик на насилство и ги повика „правото на мирно собирање да го користат во согласност со Уставот и законите на Србија“.
Што ги иницираше протестите и блокадите
Да потсетиме, студентските протести започнаа со барања за политичка и кривична одговорност за жртвите во несреќата на 1 ноември минатата година, кога се урна покривната конструкција на новосадската железничка станица.
Блокадите на образовните институции започнаа откако група мажи нападна студенти и професори од Факултетот за драмски уметности (ФДУ) додека одаваа почит на загинатите.
Неколку дена подоцна, студентите од ФДУ го блокираа факултетот, барајќи одговорност за нападот, објавување на комплетната документација за реконструкцијата на железничката станица во Нови Сад, запирање на сите постапки против уапсените за време на протестите, како и зголемување на буџетот за државните факултети за 20 отсто.
Од ден на ден, се приклучуваа сè повеќе факултети и средни училишта.
Покрај протестите и блокадите, изминатите месеци студентите организираа и други акции, како што е секојдневното оддавање почит на жртвите во симболичните 11:52 часот — времето кога се случи несреќата.
.webp){kind=icon}
