Утрово стапија во сила царините на претседателот на САД, Доналд Трамп, поставувајќи нов тест за глобалната економија. Царините се зголемени за одредени земји, а додека се чека реакцијата на пазарите, пристигнува информација дека Трамп следната недела ќе се сретне со претседателите на Русија и на Украина.
ЕКОНОМИЈА
Трамп: Царини од 100 проценти на чипови
Трамп објави дека ќе воведе царини од 100 проценти на увозот на полупроводници, но вети исклучоци за одредени компании како „Епл“ (Apple), кои го враќаат производството во САД. Најавата за најновите планови беше направена во присуство на извршниот директор на „Епл“, Тим Кук, кој најави дополнителни инвестиции во САД во износ од 100 милијарди долари. Секоја компанија што ќе покаже слични намери ќе биде ослободена од царините на чипови, соопшти Белата куќа.
Царините кон Индија зголемени на 50 проценти
САД исто така ги удвоија царините на индиската стока на 50 проценти, бидејќи таа земја, како што е наведено, продолжува да купува руска нафта. Од друга страна, претседателката на Швајцарија го напушти Вашингтон без договор за намалување на царините од 39 проценти што Трамп ги воведе кон нејзината земја.
Царините на Трамп стапија во сила
Новите сеопфатни царини на американскиот претседател Доналд Трамп официјално стапија во сила денес, што, според „Блумберг“, ќе претставува нов тест за глобалната економија. Тоа значи дека, по неколку месеци на хаотични закани и пресврти, започнува примената на повисоки царински стапки речиси за сите трговски партнери на САД, во опсег од 10 до 41 процент. Според процените на „Блумберг економикс“, просечната американска царинска стапка ќе се зголеми на 15,2 проценти, што е значително повеќе од минатогодишните 2,3 проценти и највисоко ниво од Втората светска војна.
ПОЛИТИКА
Трамп најави средба со Путин и Зеленски следната недела
На геополитички план, Трамп ги информира европските сојузници дека планира да се сретне со рускиот претседател Владимир Путин и украинскиот претседател Володимир Зеленски веќе следната недела, во уште еден обид да се постигне примирје меѓу двете земји. Да потсетиме, Трамп вчера имаше телефонски разговор со Зеленски, за време на кој изрази оптимизам во однос на можноста за прекин на огнот во Украина.
БЕРЗИ
Европа
Фјучерсите на европските акции утрово претежно се тргуваат со добивки, во пресрет на одлуката на централната банка на Англија за каматната стапка. Економистите на „Блумберг“ очекуваат дека клучната каматна стапка ќе биде намалена за четвртина процентен поен, на четири проценти, што би било најниско ниво во повеќе од две години.
САД
И фјучерсите на американските акции се тргуваат во зелено, откако беше најавено дека компаниите што ќе го вратат производството во САД ќе бидат ослободени од новите царински стапки. Тоа ја ублажи загриженоста на инвеститорите поради негативните ефекти на царините врз синџирите на снабдување.
Особено пораснаа акциите на „Епл“, кој се обврза дека ќе ја зголеми својата инвестиција во САД на вкупно 600 милијарди долари во текот на четири години. Во фокусот на инвеститорите е и монетарната политика на Федералните резерви (Фед), кои, според најавите на некои функционери, наскоро ќе треба да ја приспособат каматната стапка.
Азија
Акциите во азиско-пацифичкиот регион се тргуваат со добивки, бидејќи царините на Трамп за чипови не успеаја да го намалат оптимизмот на инвеститорите. Така, акциите на „Самсунг“ (Samsung Electronics) пораснаа за 1,7 проценти, додека акциите на ТСМЦ (TSMC) скокнаа за 4,9 проценти.
.webp){kind=icon}
Во моментов нема коментари за веста. Биди прв да коментира...