Накратко од светот: Биткоинот на нов рекорд

Ново поместување на границата беше забележано на пазарот на криптовалути во средата, додека четвртокот започна со мешани резултати на традиционалните берзи.

Американскиот претседател Доналд Трамп вчера го предупреди рускиот претседател Владимир Путин дека ќе се соочи со „многу тешки последици“ доколку неделава не се согласи на договор за прекин на огнот во Украина. Трамп изјави и дека се надева оти на состанокот в петок ќе биде договорена „втора средба“, на која ќе присуствува и украинскиот лидер Володимир Зеленски.

Потсетуваме дека Трамп претходно разговараше со европските лидери, обидувајќи се да ги увери дека нема да преговара за размена на територии со Путин и дека ќе изврши притисок врз рускиот лидер да се сретне со Зеленски.

 

ЕКОНОМИЈА

Бесент: Фед да ги намали каматите за 150 базични поени

 

Истовремено, администрацијата на Трамп продолжува да врши притисок врз политиката на Федералните резерви. Американскиот министер за финансии Скот Бесент упати најексплицитно барање досега до централната банка да спроведе циклус на намалување на каматните стапки, сугерирајќи дека референтната стапка треба да биде најмалку за 1,5 процентни поени пониска од сегашната.

 

КРИПТО

Биткоинот на нов рекорд

На пазарот на криптовалути, биткоинот во средата достигна рекорд, бидејќи инвеститорите продолжија со тактиката на преземање ризик на светските пазари. Највредната дигитална валута порасна над 123.500 долари во средата вечер во Њујорк, надминувајќи го претходниот рекорд од 123.205 долари постигнат на 14 јули.

Биткоинот бележи континуиран раст во најголемиот дел од оваа година, како резултат на поволната законодавна клима во Вашингтон што ја поттикна претседателот Трамп.

БЕРЗИ

Европа

Фјучерсите на европските акции утрово се тргуваат претежно во зелено, во очекување на објавата на податоците за БДП на еврозоната за вториот квартал, како и податоците за индустриското производство. Според прелиминарните податоци, економијата на еврозоната пораснала со стапка од 1,4 отсто во вториот квартал, што е забавување во однос на 1,5 отсто од првото тримесечје.

САД

Bloomberg

Од друга страна, фјучерсите на американските индекси бележат пад, откако министерот за финансии повторно инсистираше на олеснување на политиката на Федералните резерви. Бесент сугерираше не само дека референтната каматна стапка на Фед треба да биде пониска туку и дека централната банка можела да ја намали на претходниот состанок. Во исто време, поблагите податоци за инфлацијата во САД, објавени претходно неделава, ги зајакнаа очекувањата дека Фед веќе следниот месец би можел да ги намали каматите за четвртина процентен поен.

Азија

Акциите во азиско-пацифичкиот регион се тргуваат мешано. Јапонскиот јен порасна најмногу во речиси две недели, откако американскиот министер за финансии изрази очекување дека Централната банка на Јапонија ќе ги зголеми каматните стапки за да ја ограничи инфлацијата. Зајакнувањето на јенот ја намали вредноста на индексот Nikkei за 1,3 отсто, додека во исто време акциите во Кина пораснаа.

Во моментов нема коментари за веста. Биди прв да коментира...

Остави коментар