Водечките технолошки компании во САД алармираа стотици свои вработени со Х-1Б (H-1B) визи да избегнуваат патувања надвор од земјата, откако Белата куќа објави дека ќе воведе такса од 100.000 долари за новите апликации за оваа популарна виза.
Одлуката, објавена од претседателот Доналд Трамп, предизвика хаос меѓу странските работници, компаниите и имиграциските правници. Иако следниот ден претставник на Белата куќа појасни дека новата такса се однесува само на нови апликации — а не на обновувања или актуелни носители на визи — компаниите останаа претпазливи.
Технолошки гиганти во одбрана на своите кадри
Прочитај повеќе
Нови имиграциски правила на Трамп: Визи само за богатите
Со новите имиграциски мерки на Трамп, работните и визите за престој стануваат привилегија за богатите, а вратите за талентирани млади од светот полека се затвораат.
20.09.2025
Компании како Microsoft, Alphabet (компанијата-мајка на Google), Amazon, и други, испратија итни известувања до вработените со H-1B визи, советувајќи ги веднаш да се вратат во САД и да ги откажат сите меѓународни патувања.
„Иако дојде појаснување од Белата куќа, сепак очекуваме конфузија на граничните премини во наредните денови,“ стои во интерна комуникација на Microsoft. Компанијата додаде дека сегашните носители на визи кои се веќе надвор од земјата, сепак треба да бидат внимателни при враќањето.
Amazon, покрај H-1B, издаде предупредување и до носителите на (Х-4) H-4 визи — кои важат за брачни партнери и членови од семејството — да не ја напуштаат земјата додека не се разјасни ситуацијата.
Лични и професионални последици
За многумина, објавата пристигна во најнезгоден можен момент. Лоренс (34), инженер кој се преселува од Велика Британија во Силициумската долина, веќе го продал автомобилот, ја издал куќата и се простил од своите најблиски. По најновите случувања, неговата компанија му препорача да остане во Лондон додека не добие дополнителни правни насоки.
Вработен во Google, кој сакаше да остане анонимен, рече дека морал да го откаже долгоочекуваното патување во Токио за да ги посети родителите. Ernst & Young и Walmart, исто така, препорачаа ограничување на меѓународните патувања, наведувајќи дека ситуацијата е подложна на промени.
H-1B визата е клучна алатка за технолошките и финансиските компании во САД, кои преку неа вработуваат висококвалификувани странски работници. Во 2025 година, поднесени се над 470.000 апликации за H-1B, со квота од 65.000 визи плус 20.000 за кандидати со магистратура од американски универзитети.
Компании со најголем број на H-1B вработувања се Amazon, Tata Consultancy Services, Microsoft, Meta, Apple, JPMorgan Chase и Walmart.
Имиграциските правници предупредуваат дека новата такса ќе предизвика правна битка. Адвокатката Ракел Милстин, основач на Milstein Law Group, вели дека очекува „целосен хаос“ и верува дека ќе има итна тужба за блокирање на одлуката.
„Клиенти ни се јавуваат од Индија, каде што штотуку добиле визи, но не знаат дали ќе можат да се вратат,“ вели Милстин. „Оваа политика ќе биде оспорена и веројатно суспендирана од судовите.“
.webp){kind=icon}
