Историското протекување на податоци во Јужна Кореја ја заокружи рекордната година за сајбер напади

Масовното протекување на податоци кај најголемиот е-трговец на мало во Јужна Кореја, „Купанг“ (Coupang Inc.), го заокружува тоа што ќе се запише како рекордна година за вакви инциденти и сајбер напади во земјата, истакнувајќи ги слабостите во сајбер одбраната на Сеул.

Од компанијата „Купанг“, популарна во сегментот на испораки на намирници во утринските часови, изјавија дека околу 33,7 милиони сметки на клиенти биле погодени од протекувањето, кое ги компромитирало електронските и физичките адреси за испорака, како и телефонските броеви на клиентите.

 

„Ако сето ова официјално се потврди бројката, што претставува речиси две третини од популацијата на Јужна Кореја, која брои 51,7 милиони жители, ќе биде рекордна“, изјави за „Блумберг њуз“ функционер од Комисијата за заштита на лични податоци. Истрагата е во тек.

Нејасно е кој стои зад протекувањето, но локалните медиуми објавија дека поранешен вработен во „Купанг“ можеби искористил ранливост на системот. Службениците предупредија дека компромитираните информации би можеле да се користат за извршување на целни фишинг напади.

Корејските весници денеска ја објавија приказната на насловните страници бидејќи расте загриженоста за можни прекини по пробивот. Со речиси 25 милиони активни корисници, многу корејски семејства се потпираат на малопродажниот центар сличен на „Амазон“ (Amazon) за најголемиот дел од нивното купување, обично предавајќи чувствителни информации како што се кодови од врати на згради и станови за да се олеснат испораките.

Акциите на „Анлаб“ (Ahnlab Inc.) денеска пораснаа за дури осум проценти во Сеул бидејќи инцидентот предизвика нов интерес за онлајн безбедноста.

„Јужна Кореја бележи постојан пораст на сајбер инцидентите секоја година, а се предвидува дека во 2025 година ќе биде регистриран најголем број напади досега“, рече Виталиј Камлук, основач на фирмата за сајбер безбедност „Титанекс“ (TitanHex).

„СК Телеком“ (SK Telecom Co.), најголемиот мобилен оператор во земјата, оваа година беше казнет со 97 милиони долари поради незаштитување на податоците на клиентите и за доцно пријавување на прекршувања. „КТ корп“ (KT Corp.) и „Лот кард“ (Lotte Card Co.), исто така, открија протекување на информации во последните месеци.

Минатата недела, најголемата крипто берза во земјата, „Апбит“ (Upbit) беше хакирана во сомнителен севернокорејски напад  - истиот ден кога нејзината матична компанија објави дека е купена од јужнокорејскиот интернет гигант „Нејвер“ (Naver Corp).

„Гледајќи ги инцидентите со хакирање и неуспесите на безбедносниот систем во целина, во споредба со другите земји - особено САД, просечното ниво на инвестиции во безбедносни системи во Кореја е жално несоодветно“, рече Ли Чан-џин, гувернер на Службата за финансиски надзор.