„Рајнметал“ (Rheinmetall AG) изрази „најдлабока почит“ кон украинските одбранбени напори против Русија, откако се создаде впечаток дека главниот извршен директор на германската компанија ја намали важноста на нивната употреба на дронови.
Украинците даваат „неизмерлив придонес“ во својата одбрана, особено имајќи предвид дека земјата се бори „многу ефикасно дури и со ограничени ресурси“, соопшти компанијата со седиште во Диселдорф во изјава објавена на платформата X.
Најголемиот германски изведувач во одбранбениот сектор се соочи со остри реакции од јавноста во последните денови, откако извршниот директор Армин Папергер беше цитиран во напис на магазинот „Атлантик“ (The Atlantic) од 27 март, во кој ја отфрли украинската насоченост кон дронови со зборовите: „Тоа е како играње со лего-коцки“.
Во написот извршниот директор истакна дека украинската технологија на мали дронови не е на исто ниво како технолошкиот напредок на компании како „Локид Мартин“ (Lockheed Martin), „Џенерал динамикс“ (General Dynamics) и „Рајнметал“ (Rheinmetall). Најголемите производители на дронови во Украина се „домаќинки“ што имаат „3Д-печатачи во кујната“, изјави Папергер. „Тоа не е иновација.“
Неговите коментари предизвикаа бран критики, вклучувајќи ја и реакцијата на Олександер Камишин, советник на украинскиот претседател Володимир Зеленски. Тој доцна во саботата се огласи на платформата X за да се спротивстави на природата на тие забелешки: „‘Рајнметал’ вели дека нашите ‘лего-дронови’ се ‘направени oд домаќинки во нивните кујни’. Добро“, напиша тој. „Меѓутоа, нашите ‘лего-дронови’ веќе изгореа повеќе од 11.000 руски тенка“, додаде тој.
Камишин продолжи во неделата со објава во која истакна дека украинските жени „заслужуваат почит“.
Во меѓувреме Флоријан Сибел, коосновач и коизвршен директор на германскиот производител на дронови „Квантум системс“ (Quantum Systems), на Линкдин објави дека му е „многу жал и срам поради јавните изјави на колегата – извршниот директор од германскиот одбранбен сектор“. „‘Квантум системс’ стои зад сите украински домаќинки“, додаде тој, нудејќи делење воени амблеми што ја прикажуваат украинската жена како управува со дронови.
„Рајнметал“ во посебна изјава во неделата истакна дека „иновативната сила и боречкиот дух на украинскиот народ се инспирација“. Компанијата е благодарна што може да ги понуди своите ресурси за ѝ да помогне на земјата, додаваат од фирмата.
„Рајнметал“ не одговори веднаш на прашањата на „Блумберг“ за дополнителен коментар.
Компанијата, која произведува од муниција до тенкови, е еден од изведувачите што забележаа силен раст на продажбата поради руската инвазија на Украина - која трае веќе петта година - како и поради итната потреба на европските земји за повторно вооружување.
Со плановите за започнување изградба на фабрика за муниција и барут во Украина оваа година, компанијата веќе управува со центар за одржување на своите возила „мардер“ (Marder) и тенкови „леопард“ (Leopard) во земјата што е разурната од војна.
Армин Папергер
Bloomberg
.webp){kind=icon}
