Зеленски: Ќе ја преплавиме Русија со дронови и ќе го затвориме нејзиниот воздушен простор

Украинскиот претседател Володимир Зеленски предупреди дека рускиот воздушен простор би можел фактички да стане небезбеден за цивилниот воздушен сообраќај, најавувајќи интензивирање на украинските напади со беспилотни летала врз цели на руска територија.

„Рускиот воздушен простор фактички ќе се затвора. Едноставно ќе има дронови на небото над Русија во размери со кои ќе мора да се сooчат“, напиша Зеленски доцна во вторникот на платформата Х.

Најавата следуваше по шестата последователна ноќ на смртоносни руски ракетни напади врз Киев и околниот регион, додека Украина се соочува со недостиг од американски ракети „патриот“ за противвоздушна одбрана. Речиси непрекинатите воздушни тревоги дополнително го нарушуваат секојдневниот живот во земјата.

Зеленски нагласи дека Украина нема намера да ги загрозува цивилните авиони, но истовремено ги предупреди авиокомпаниите, осигурителните компании и сите други субјекти што го користат рускиот воздушен простор дека летовите над Русија стануваат сè понебезбедни. Како особено ризични ги посочи и големите аеродроми во Москва и Санкт Петербург.

Украина нема цивилен воздушен сообраќај откако Кремљ ја започна целосната инвазија врз земјата пред повеќе од четири и пол години. Русија, од друга страна, и натаму одржува домашни и одредени меѓународни воздушни линии, што е од особено значење за земја што се протега низ 11 временски зони.

Володомир Зеленски Bloomberg

Најавената кампања со дронови би претставувала продолжување на напорите на Киев да ја пренесе војната подлабоко на руска територија. Украинските сили во последниот период изведуваат напади врз рафинерии, пристаништа и логистички објекти, а меѓу последните цели беа и магацини на големи руски компании за онлајн трговија.

Сепак, Зеленски посочи дека Украина е подготвена да покаже одредена воздржаност доколку тоа е потребно за дипломатските напори. Тој изјави дека Киев е подготвен, по барање од сојузниците, привремено да ги прекине нападите со дронови во одредени делови од рускиот воздушен простор за да се овозможи одржување мировни преговори.

Според Зеленски, Украина кон крајот на август го почитувала барањето на САД да ги прекине нападите врз Москва и Санкт Петербург, во периодот кога директорот на ЦИА, Џон Ретклиф, престојувал во Москва. Тој исто така рече дека Киев, по барање од друга, неименувана држава, ги прекинал нападите во близината на Владивосток, на рускиот Далечен Исток.

Во меѓувреме американските напори за посредување меѓу Русија и Украина засега не донесоа конкретен напредок. Преговорите не дадоа значајни резултати откако американскиот претседател Доналд Трамп се врати во Белата куќа со ветување дека брзо ќе стави крај на војната.

Наместо деескалација, Киев и Москва ги засилија воздушните напади, при што двете страни целат на енергетска инфраструктура и логистички капацитети на противникот. Развојот на ситуацијата дополнително ги зголемува ризиците за цивилното население, но и за транспортот и економските активности поврзани со воздушниот сообраќај во регионот.

Зеленски во понеделникот соопшти дека имал „детален и конструктивен разговор“ со специјалните пратеници на Трамп, Стив Виткоф и Џаред Кушнер, по што, како што рече, се разговара за утврдување датуми за нивна посета на Киев. Посетата досега неколкупати беше најавувана од украинскиот претседател, но сè уште не е реализирана.

Виткоф во изминатиот период осум пати патувал во Москва и во повеќе наврати разговарал со рускиот претседател Владимир Путин. Зеленски порача дека Киев е свесен за новите планирани средби во Москва и дека тоа ќе го земе предвид при понатамошното одлучување за своите воени активности.