Десетици загинати во жесток руски напад врз Киев, Зеленски бара проектили од Западот

Најмалку 12 луѓе загинаа, а десетици се ранети во уште еден руски ракетен напад насочен кон Киев, соопшти градоначалникот Виталиј Кличко на Телеграм.

Министерството за внатрешни работи на Украина соопшти дека неколку индустриски објекти и станбени области биле погодени во Киев и неговите предградија. Избиле пожари, при што некои биле делумно изгаснати до раните утрински часови во четвртокот. На некои локации цивили биле заробени во засолништа и станбени згради поради оштетувања и разурнувања, соопшти министерството на Телеграм.

Министерството за одбрана на Русија соопшти дека нејзините сили извршиле голем ноќен напад со прецизно оружје и беспилотни летала со долг дострел врз воено-индустриски и логистички цели во Киев и околниот регион, тврдејќи дека биле оштетени производствени капацитети за беспилотни летала и ракети, како и складиште за муниција, логистички центар и складиште за гориво во регионот на Киев.

Руските воздушни напади врз Киев и другите украински градови стануваат сè посмртоносни, бидејќи на Украина ѝ недостигаат пресретнувачки проектили „патриот“, главното оружје што го снабдува Западот за одбрана од многу ракети, додека новите сојузнички испораки се во застој. Претседателот Володомир Зеленски почна да ги повикува партнерите на Украина да ги зголемат резервите од воздушна одбрана по ваквите напади.

„За жал, додека Москва инвестира во балистички ракети и ескалација, ваквите напади не секогаш добиваат одговор од светот каков што треба“, посочи украинскиот претседател во четвртокот.

 

 

Украинската државна железничка компанија соопшти на Телеграм дека спровела итни протоколи за да ја осигури безбедноста на патниците и ги пренасочила возовите за да ги заобиколат оштетените делови од железничката мрежа.

Сирените за воздушен напад се огласувале низ цела Украина од полноќ, при што претставници на противвоздушната одбрана предупредуваа на закани од различни видови ракети и беспилотни летала придвижувани со млазни мотори.