Романија: падна проевропската влада на премиерот Боложан

Владата на Романија падна денеска откако го загуби гласањето за доверба, со што се иницираат  тешки преговори околу новиот кабинет пред којшто е задачата за справување со најголемиот буџетски дефицит на некоја членка на Европската Унија.

Социјалдемократите, најголемата партија во романскиот парламент која го иницираше гласањето за доверба на малцинскиот кабинет на премиерот Илие Боложан, го повикаа претседателот Никушор Дан брзо да свика разговори со политичките партии, а премиерот да поднесе оставка од функцијата привремен лидер.

Дан подоцна во вторник изјави дека прво ќе одржи неформални разговори со партиите за да го провери расположението и да ги процени потенцијалните опции, ветувајќи дека новата прозападна влада ќе биде формирана во „разумен временски рок“.

„Сакаме да ја задржиме истата коалиција, да видиме дали ќе има промени. Не ги поддржуваме малцинските влади, но сите опции се на маса“, изјави за новинарите во Букурешт шефот на Социјалдемократската партија, Сорин Гриндеану. Сепак, тешко е да се предвиди кои би можеле да бидат тие опции.

Предлогот беше поддржан од 281 пратеник во 464-члениот законодавен дом и беше усвоен со поддршка на Алијансата за единство на Романците (АЕР), главната крајно десничарска опозициска партија и втора по големина во парламентот. АЕР и социјалдемократите претходно ја исклучија можноста за правење коалиција, комплицирајќи ја политичката математика во претстојните разговори.

Падот на владата на Боложан доаѓа само 10 месеци откако тој формираше четири-партиска алијанса за да ја спречи растечката крајно десна партија, која беше тесно поразена во серија избори во текот на изминатите две години.

Романската валута леа девалвираше за 0,9 отсто во однос на еврото во вторник, што е уште еден знак дека централната банка дозволува нејзината валута да се тргува на послаби нивоа под режимот на управувано флуктуирање. Леата се тргуваше на 5,2397 за евро во 18:20 часот во Букурешт, откако минатата недела ослабе преку она што претходно се сметаше за клучен праг од 5,1 леи за евро.

  Романската леа значително слабее во време на политички кризи

Bloomberg

 

Приносот на 10-годишните државни обврзници се зголеми за речиси 60 базични поени од почетокот на годината, на 7,29 отсто во вторник, што е највисоко ниво во ЕУ.

Социјалдемократите изјавија дека би сакале да состават нова проевропска коалиција без Боложан. На интерно гласање во вторник, Либералната партија на премиерот ја потврди својата претходна одлука да не ја обновува коалицијата со социјалдемократите.

Освен ако поранешните владејачки партии не ги омекнат своите позиции во преговорите, тие црвени линии значат дека има ограничени опции за нова влада.

Кој и да го предводи следниот кабинет веројатно ќе се бори да обезбеди политичка поддршка за клучните реформи потребни за да се ослободат близу 8 милијарди евра (9,4 милијарди долари) од фондовите за закрепнување на ЕУ што истекуваат по август.

Искористувањето на парите е клучно за намалување на буџетскиот дефицит што достигна 7,7 отсто од БДП минатата година, за заштита на кредитниот рејтинг на земјата и за држење чекор со  зголемените трошоци за финансирање на долгот и нестабилната валута под контрола.

Иако предвремените избори сè уште изгледаат малку веројатни, продолжениот политички ќорсокак може да ја зголеми можноста за предвремени избори, какви што Романија немала од крајот на комунизмот.

Распишувањето општи избори веројатно нема да биде прифатливо за која било од проевропските партии, со оглед на тоа што би можело да го отвори патот за екстремно десничарската партија АОР, која е водечка на анкетите, да ја освои власта за прв пат.