Зеленски прв пат зборува за прекин на огнот

Украинскиот претседател Володимир Зеленски најавува дека ќе прифати прекин на огнот со Русија без притоа да бара враќање на украинските територии кои Русија го окупираше, но само ако за остатокот од земјата добие безбедносни гаранции од НАТО.

Ова е најсилниот сигнал досега дека украинскиот лидер е отворен за завршување на војната без враќање на целата територија. Тој го изнесе овој предлог во интервју за британскиот ТВ канал Скај Њуз. Ова е првото интервју на Зеленски по победата на Доналд Трамп на претседателските избори во САД.

„Ако сакаме да ја запреме жешката фаза на војната, треба да ја ставиме под капата на НАТО територијата на Украина што ја имаме под наша контрола. Ова е она што треба да го направиме брзо“, рече Зеленски во интервјуто, според преводот на Скај Њуз. „И потоа Украина може дипломатски да врати уште еден дел од својата територија“.

Тој додаде дека ниту една земја не и дала таков предлог на Украина и дека ќе биде тешко да се воспостави заштита на НАТО само за дел од земјата.

Од друга страна, портпаролот на Кремљ, Дмитриј Песков, изјави дека за да се дојде до решение за украинскиот конфликт неопходно е да се елиминираат основните причини за него.

Зборувајќи за параметрите за решавање на конфликтот во Украина, Песков истакна дека покрај основните причини, треба да се земат предвид и „идеите што претседателот на Русија, Владимир Путин ги презентираше кога се обрати пред високиот штаб на Министерството за надворешни работи во јуни“.

Тогаш Путин рече дека Русија „веднаш“ ќе ги прекине борбените операции доколку Украина се откаже од кандидатурата за членство во НАТО и ги повлече своите трупи од регионите Доњецк, Луганск, Херсон и Запорожје.

„Штом Украина почне да ги повлекува трупите од Донбас и Новоросија и се обврзе дека нема да влезе во НАТО, Руската Федерација ќе го прекине огнот и ќе биде подготвена за преговори. Мислам дека тоа нема да трае долго“, додаде рускиот претседател.

Претходно, членките на НАТО се спротивставија на аспирациите на Украина наскоро да се приклучи на воената алијанса, бидејќи одбранбените одредби бараат тие да испратат свои сили за да ги одбијат сите идни напади.

Речиси тригодишната војна се движи кон пресвртница бидејќи руските трупи продолжуваат да напредуваат од исток, а новоизбраниот претседател на САД Доналд Трамп вети дека ќе ги прекине непријателствата.

Претседателот Џо Бајден ја засили поддршката во последните недели од неговата администрација, вклучително и дозволувањето на Киев да користи американско оружје подлабоко на руска територија.

Потезите се насочени кон зајакнување на улогата на Зеленски во разговорите за прекин на огнот, кои се очекува Трамп да ги продолжи.