Аналитичкиот тим на „Блумберг Адрија“ во новата анализа се фокусира на производителите на мебел и на трговците на мало во регионот. Тие навлегуваат во двигателите, предизвиците и карактеристиките на играчите на пазарот за мебел и ги мерат нивните перформанси во однос на глобалните играчи.
„Пазарот за мебел покажа отпорност за време на пандемијата. Мебелот беше меѓу ретките трајни производи за широка потрошувачка што не забележаа пад на побарувачката во 2020 година. За наредниот период не гледаме простор за некое големо зголемување, туку стагнација или дури повремено намалување на продажните бројки и маржите на ЕБИТДА. Негативниот елемент што го спречува понатамошното зголемување на профитабилноста најчесто произлегува од намалувањето на расположливиот доход погоден од инфлацијата, загриженоста за рецесија и зголемувањето на каматните стапки“, се вели во анализата.
Кои се кочниците за поголем раст?
Нашите аналитичари откриваат дека најголемиот потсегмент во овој сектор е мебелот за дневна соба, кој може да се пофали со удел од 40 проценти од вкупното пазарно вреднување во 2021 година.
„Побарувачката беше стимулирана главно од станбениот сегмент. Имено, потрошувачите поминуваа повеќе време дома и затоа ја нагласуваа потребата, односно сакаа да го подобрат просторот за живеење или да го приспособат за работа од далечина“, велат аналитичарите.
Тие ги идентификуваат главните двигатели на растот, вклучувајќи го и проширувањето на секторите за недвижности и угостителство и зголемувањето на цените на мебелот. Исто така, нашиот тим ги наведува главните кочници за растот на секторот што се рефлектираат во силната конкуренција, прекините на синџирот на снабдување, структурните проблеми и влошувањето на расположението на потрошувачите.
Анализата покажува и како различни земји се позиционирани на глобалниот пазар на мебел и истакнува кои се компаративните предности на регионот Адрија во индустријата.
Споредба
Аналитичкиот тим на „Блумберг Адрија“ во анализата ги дели компаниите од регионот на два сегмента – производители на мебел и трговци на мало.
„Нашето образложение е дека тоа ќе ни овозможи поширок увид во регионалните индустриски трендови. Производителите ќе дадат увид во страната на понудата на регионалната индустрија, додека трговците на мало ќе ја раскажат приказната од страната на побарувачката и ќе ги посочат навиките на крајните потрошувачи. Производителите во нашиот примерок се различни во однос на понудените производи и видовите на деловни модели. Заедничка нишка е употребата на дрво во производите“, велат аналитичарите.
Тие укажуваат дека подгрупата на производители на мебел во регионот Адрија забележа двоцифрен просечен пораст на продажбата во 2021 година од 14,8 проценти.
„Нивоата на продажба покажаа скромен раст (3,4 проценти) дури и во 2020 година, кога повеќето сектори забележаа пад на приходите. Сепак, кога најголем дел од секторот доживеа раст, некои компании забележаа пад на приходите во 2020 година. Гледаме две главни причини зад тоа: значајна изложеност на комерцијалниот/угостителскиот сектор и природата на производот - луксузните и рачно изработените производи беа почувствителни на опаѓањето на расположението на потрошувачите“, велат аналитичарите.
Тие анализираат и како различни компании во регионот генерирале приходи, управувале со инвестиции и реагирале на турбуленциите на пазарот.
„За да понуди заднина за поширокиот пазар на мебел, анализата се занимаваше и со најголемите трговци на мало и производители на мебел во светот. Малопродажбата помина низ тежок период во 2020 година, забележувајќи намалување“, велат аналитичарите.
Кај избраните компании од малопродажбата преклани има просечен пад од 3,3 проценти, а во 2021 година се забележува зголемување кај приходната страна во просек од 8,7 проценти, предводено од повторното отворање на продавниците и зголемувањето на цените на мебелот.
Очекувања
Нашиот аналитички тим очекува ладење на пазарот на мебел поради намалувањето на расположливиот приход погоден од инфлацијата, загриженоста за рецесија и зголемените каматни стапки.
„Од друга страна, гледаме дека канцеларискиот/деловниот сегмент добива на сила бидејќи луѓето се враќаат на работа и заживува угостителскиот сектор. Очекуваме луксузниот мебел од дрво постепено да се замени со подостапни и поодржливи производи“, велат аналитичарите.
Што се однесува до малопродажбата, тие очекуваат онлајн продажбата да добие уште поголем приоритет во иднина.
„Едноставно кажано, индустријата сè повеќе се дигитализира. Играчите што брзо реагираа и се приспособија на овој тренд успеаја да ја задржат продажбата и да ги зголемат своите онлајн платформи“, велат аналитичарите.
Тие очекуваат понатамошни инвестиции во регионалната индустрија за мебел.
„Главни двигатели се ниските оперативни трошоци и близината до пазарите во ЕУ. Сепак, долгорочните еколошки и демографски фактори може да ја нарушат компаративната предност на регионот во производството на мебел. Тие вклучуваат уништување на шумите и зголемен недостиг од работна сила“, велат од нашиот аналитички тим.
.webp){kind=icon}
