25 април 2023, 13:10
Серџо Ермоти рече дека банката нема да ги загрози билансот на состојбата и ликвидноста
Тој повтори дека имаат намера да обезбедат прогресивна дивиденда
Bloomberg Mercury
Главниот извршен директор на УБС (UBS Group AG), Серџо Ермоти, вели дека плановите за откуп на акции на банката се привремено суспендирани, но не и откажани, бидејќи се бори со сложената интеграција на „Кредит Суис“ (Credit Suisse Group AG).
Ермоти, кој се врати да ја води банката низ процесот на итно преземање, рече дека е премногу рано да се каже кога ќе продолжат откупите и дека им треба потемелен увид во бројките и деловните планови. Тој зборуваше во интервју за ТВ „Блумберг“ во вторникот.
„Ја повторуваме нашата намера секоја година да имаме прогресивно зголемување на нашата дивиденда во готовина и дефинитивно имаме намера да продолжиме со откуп на акции кога е тоа потребно“, рече Ермоти.
УБС го замрзна откупот кога минатиот месец објави преземање на најголемиот ривал во швајцарското банкарство, со поддршка од владата. Договорот ја трансформира банката од стабилен менаџер на средства со предвидливи политики за профит и враќање на капиталот во режим на реструктурирање што можеби ќе одземе и до четири години за интеграција на „Кредит Суис“.
„Цврстината на билансот на состојба и ликвидноста се клучни во размислувањата за продолжување на откупот“, додаде тој.
„Банката не исклучува потенцијална рецесија кон крајот на оваа или почетокот на следната година“, рече Ермоти. Повторувајќи ги коментарите на другите директори на УБС, тој посочи дека на компанијата ќе ѝ треба време да ја разгледа иднината на дејствувањето на „Кредит Суис“ во Швајцарија.