Компанијата АМД (Advanced Micro Devices Inc.), најдиректниот ривал на „Енвидија“ (Nvidia Corp.) во областа на процесори за вештачка интелигенција, соопшти дека американските ограничувања за продажба во Кина ќе ги чинат 1,5 милијарда долари во приходи годинава - предупредување што го засени инаку позитивниот финансиски изглед.
Овие проекции произлегуваат од извозните ограничувања воведени во април, кои се однесуваат на чиповите АМД МИ308 (AMD MI308), соопшти компанијата за време на повикот со инвеститорите во вторникот. Се очекува приходите од центри за податоци да паднат во тековниот период, поради намалување од 700 милиони долари во продажбата на тој производ, предвидува АМД.
Главната извршна директорка Лиза Су останува оптимистична во однос на побарувачката за инфраструктура за вештачка интелигенција. Таа ја повтори и својата прогноза дека новите чипови што наскоро ќе дебитираат ќе помогнат во зголемување на продажбата во втората половина од годината. Но се соочува со загриженост од инвеститорите во врска со трговските ограничувања и царините, како и со предизвиците да се натпреварува со поголемиот ривал „Енвидија“ на пазарот на чипови за вештачка интелигенција.
Акциите на АМД, кои се зголемија за повеќе од 7 проценти поради позитивниот квартален извештај, паднаа откако компанијата го објави влијанието од продажбата во Кина. Сепак, акцијата почна да закрепнува откако Су го изнесе својот став за време на конференцискиот повик со аналитичари.
„Возбудени сме околу целокупниот бизнис со вештачка интелигенција - мислам дека и понатаму гледаме сила таму“, рече таа. „Знам дека постојат одредени неизвесности поврзани со царините и други прашања, но ова е едно од оние подрачја во кои, од гледна точка на инфраструктурата, продолжува да има инвестиции во инфраструктурата за ВИ. Затоа очекуваме силен раст во втората половина од годината“.
АМД минатиот месец соопшти дека очекува трошоци од околу 800 милиони долари поради новите извозни правила.
Акциите на производителот на чипови завршија претходно во вторникот на цена од 98,62 долари, што е пад од 18 oтсто од почетокот на годината.
За второто тримесечје компанијата предвидува приходи од околу 7,4 милијарди долари, во споредба со просечната процена на аналитичарите од 7,23 милијарди.
АМД продолжува да остварува напредок на профитабилниот пазар на процесори за центри за податоци, при што зема удел од „Интел“ (Intel Corp). Исто така има полза и од силната побарувачка за чипови што се главна компонента во персоналните компјутери.
Продажбата во првиот квартал на АМД порасна за 36 отсто и изнесуваше 7,4 милијарди долари, надминувајќи ја процената од 7,12 милијарди. Добивката беше 96 центи по акција, без одредени трошоци.
Приходите од одделот за центри за податоци достигнаа 3,7 милијарди долари во овој период, што е зголемување од 57 отсто во однос на истиот период лани. Аналитичарите во просек предвидуваа 3,66 милијарди долари. Продажбата поврзана со персонални компјутери се зголеми за 28 отсто и достигна 2,9 милијарди долари.
Во деценијата откако Су стана главна извршна директорка на АМД, компанијата се трансформира во водечки снабдувач на технологии во компјутерската индустрија. Денес остварува повеќе од пет пати поголеми приходи отколку пред десет години и веќе не е во сенка на „Интел“. Но сè уште е далеку зад „Енвидија“ на експлозивно растечкиот пазар за ВИ-акцелератори - категорија во која спаѓа и МИ308.
.webp){kind=icon}
