Пресврт во политиките на САД: „Енвидија“ ќе продолжи да продава некои чипови за ВИ во Кина

„Енвидија“ планира да ја продолжи продажбата на својот чип Х20 (анг. H20) за вештачка интелигенција (ВИ) во Кина откако доби гаранции од Вашингтон дека таквите испораки ќе бидат одобрени, што е драматичен пресврт од претходниот став на администрацијата на Доналд Трамп во врска со мерките дизајнирани да ги ограничат амбициите на Пекинг за вештачка интелигенција.

Службеници на американската влада ѝ кажаа на „Енвидија“ дека ќе дадат зелено светло за извозни лиценци за акцелераторот на вештачка интелигенција Х20, соопшти вчера компанијата во блог пост - потег што може да додаде милијарди долари на приходите на „Енвидија“ оваа година, враќајќи ја нејзината способност да ги реализира нарачките што ги отпиша како изгубени поради владини ограничувања. „Енвидија“ го дизајнираше помалку напредниот чип Х20 за да се усогласи со претходните трговски ограничувања од Вашингтон за Кина, кои тимот на Трамп ги заостри во април за да ја блокира продажбата на Х20 во азиската земја без дозвола од САД.

Главниот извршен директор Јенсен Хуанг, кој минатата недела се сретна со претседателот Доналд Трамп и моментално е во Пекинг каде што присуствува на конференција спонзорирана од владата, се појави на кинеската државна телевизија „Си-си ТВ“ (CCTV) кратко откако „Енвидија“ ја објави одлуката, велејќи дека компанијата обезбедила одобрение за почеток на испораката. Министерството за трговија, кое ги надгледува американските контроли на извозот на чипови и алатките што се користат за нивно производство, не одговори веднаш на барањето за коментар дали агенцијата веќе издала лиценци за Х20.

Американскиот потег доаѓа на неколку недели по одмрзнувањето на односите меѓу Вашингтон и Пекинг, како резултат на трговското примирје кое е дизајнирано за двете страни да одобрат извоз на клучните технологии. По средбата со својот кинески колега минатата недела, американскиот државен секретар Марко Рубио рече дека постои „силна желба од двете страни“ за средба меѓу Трамп и претседателот Шји Џјинпинг подоцна оваа година.

David Paul Morris/Bloomberg

 

Вашингтон во последните недели укина низа контроли на извозот - вклучително и софтвер за дизајн на чипови - воведени пред трговските разговори минатиот месец во Лондон. Тоа е во замена за тоа што Кина дозволува поголема продажба на ретки минерали потребни за производство на низа високотехнолошки производи, нешто што американските преговарачи мислеа дека го постигнале претходниот месец за време на разговорите во Женева. Во текот и по тие преговори, тимот на Трамп уверуваше дека контролите врз чиповите Х20 на „Енвидија“ не се предмет на дискусија.

Пресвртот означува огромна победа за Хуанг, кој ги нарече ограничувањата на американските чипови „неуспех“ што го поттикна подемот на „Хуавеј технолоџис“ како главен кинески ривал на „Енвидија“. Испораките на Х20, исто така, би биле благодет за повеќе компании, од „Дипсик“ до „Алибаба“, кои и покрај напредокот на „Хуавеј“ во работата со полупроводниците имаат потреба од хардвер на „Енвидија“ за обука, проширување и управување со услугите за вештачка интелигенција што ги градат за да се натпреваруваат со компании како „Опен еј-ај“.

Bloomberg

 

Фјучерсите на индексот Nasdaq скокнаа по објавата на „Енвидија“, а позитивно реагираа и кинеските акции. Акциите на „Алибаба“ вчера во Хонгконг пораснаа за дури шест проценти, индексот Hang Seng Tech порасна за дури 2,2 отсто, а операторите на центри за податоци како „Бејџинг синет технолоџи“ (Beijing Sinnet Technology Co.) скокнаа за дури 8,4 проценти.

„Продолжувањето на продажбата на Х20 од страна на „Енвидија“ во Кина е очигледно позитивно“, рече Веј-Серн Линг, генерален директор во „Јунион бенкер приви“ (Union Bancaire Privee). „Не само за компанијата, туку и за синџирот на снабдување со полупроводници за вештачка интелигенција, како и за кинеските технолошки платформи кои градат способности за ВИ. Ова е исто така добар развој на настаните за односите меѓу САД и Кина.“

САД прво ја ограничија продажбата на „Енвидија“ во Кина во 2022 година, со широки ограничувања дизајнирани да ја спречат азиската земја да пристапи до напредна вештачка интелигенција што би можела да и користи на кинеската војска. „Енвидија“ неколку пати дизајнираше нови процесори за кинескиот пазар за да се усогласи со тие мерки, кои станаа централна точка на тензиите меѓу Вашингтон и Пекинг.

Bloomberg

 

Во рок од неколку месеци од првичните ограничувања, производителот на чипови го претстави Х800 (анг. H800), чија продажба во Кина во 2023 година беше забранета од администрацијата на претседателот Џо Бајден. „Енвидија“ одговори со Х20, за што официјалните лица на Бајден ги разгледаа, но сепак на крајот не ги проширија ограничувањата за извоз. Откако Трамп продолжи со контролите на Х20 во април, „Енвидија“ дизајнираше друг производ фокусиран на Кина, „RTX PRO“. Компанијата го опиша тој чип како „целосно усогласен“, што значи дека паѓа под техничките прагови што би барале одобрение од Вашингтон за извоз во втората по големина економија во светот.

 

Размената ја одразува важноста на кинескиот пазар за „Енвидија“, која минатата недела влезе во историјата како прва компанија што достигна пазарна вредност од четири трилиони долари - доказ за нејзината централна улога во обезбедувањето хардвер за бум во градењето инфраструктура за вештачка интелигенција по „Чет ГТП“. Хуанг моментално бара разговори со кинеските лидери, вклучително и министерот за трговија, а веројатно темата би била централната улога на „Енвидија“ во глобалното воведување на ВИ.

Bloomberg

 

Хуанг, исто така, станува сè погласен во Вашингтон. Неодамна изјави дека креаторите на политиките не треба да се грижат за кинеската војска што користи чипови на „Енвидија“ - едно од централните оправдувања за ограничувањата на САД - бидејќи Пекинг не може да се потпре на нешто што Вашингтон би можел да го ограничи во кој било момент. Тој, исто така, во мај предупреди дека губењето на пазарниот удел на „Енвидија“ во азиската земја - од 95 на 50 проценти - директно му користи на „Хуавеј“, хардверскиот гигант со седиште во Шенжен, во центарот на технолошките амбиции на Пекинг.

Сепак, со месеци се чинеше дека шефот за технологија води изгубена битка. Иако некои претставници на Трамп се заинтересирани да се зголеми продажбата на „Енвидија“ на пазари како Блискиот Исток, тие се држеа до ограничувањата во Кина.

„Очигледно имаме огромно почитување кон Јенсен“, рече во мај Срирам Кришнан, виш советник за политика на вештачка интелигенција во Белата куќа. „Но, сè уште постои двопартиска и широка загриженост за тоа што може да се случи со овие графички процесори откако физички ќе се најдат во Кина“, рече Кришнан.

Bloomberg

 

Следниот месец, за време на трговските преговори меѓу САД и Кина во Лондон, директорот на Националниот економски совет на Белата куќа, Кевин Хасет, рече дека подготвеноста на Вашингтон да укине некои контроли за извоз поврзани со чиповите не се однесува на мерките за Х20. „Не зборувам за многу, многу луксузните работи на ‘Енвидија’“, изјави тој за „Си-ен-би-си“ (CNBC) во тоа време. Министерот за финансии Скот Бесент ја повтори таа порака до сенаторите подоцна истата недела, велејќи дека „нема ‘quid pro quo’ (кога нешто се дава во замена за нешто друго од иста или слична важност) во однос на чиповите за ретките метали“.

Сепак, кога пратениците го притиснаа Бесент за тоа кои точно ограничувања на полупроводници би можеле да бидат предмет на дискусија, тој не исклучи можно олеснување на најсовремените чипови и производствена опрема.

„Она што го велам е дека нема намера да се зголеми пристапот на Кина до напредни американски полупроводници“, рече Бесент за време на сведочењето пред Конгресот во јуни. „Всушност, ние го направивме токму спротивното. Ставивме контрола на извозот на Х20 на „Енвидија“, кој би го сметал за чип од многу висока класа, но не и за чип од највисока класа.“
 

— Текстот е напишан со помош од Вини Хсу, Деби Ву, Синди Ванг и Мег Шен