Aкциите на „Мајкрософт“ (Microsoft Corp.) паднаа откако „Информејшн“ (The Information) објави дека софтверската компанија ги намалила очекувањата за привлекување бизнис-клиенти што ќе трошат пари на технологии во облак за модели и агенти на вештачка интелигенција.
Неколку оддели во „Мајкрософт“ ги намалиле квотите за тоа колку многу продавачите треба да ја зголемат продажбата на одредени производи за вештачка интелигенција откако многумина од нив не ги исполниле целите во фискалната година што заврши во јуни, известува „Информејшн“, повикувајќи се на двајца продавачи од облакот Ажур (Azure). Оваа необична промена одразува како „Мајкрософт“ ја компензира отпорноста на компаниите да плаќаат повеќе за вештачка интелигенција, според извештајот.
„Статијата на ‘Информејшн’ неточно ги комбинира концептите на раст и на квоти за продажба“, посочи портпаролот на „Мајкрософт“ во пишана изјава. „Вкупните квоти за продажба на производи за вештачка интелигенција не се намалени.“
Акциите паднаа дури за 3 отсто во Њујорк во средата, но го намалија падот откако аналитичарите и инвеститорите ги разгледаа извештаите на „Информејшн“.
Во истражувачка белешка, „Џефрис“ (Jefferies) напиша дека публикацијата „целосно ја пропуштила поентата во својот напис“, додавајќи дека нивните аналитичари разговарале со раководството на компанијата. „Џефрис“ исто така напиша дека „Мајкрософт“ ги поттикнува инвеститорите да се фокусираат на забрзувањето на преостанатите обврски, што е индикација за идни приходи. Аналитичарите исто така изјавија дека нивните проверки покажале силна прифатеност на линијата на ВИ-асистентот Копилот (Copilot) од „Мајкрософт“.
„Мајкрософт“ и неговите големи технолошки конкуренти, вклучувајќи ги „Алфабет“ (Alphabet Inc.), „Мета“ (Meta Platforms Inc.) и „Амазон“ (Amazon.com Inc.), потрошија огромни средства за чипови, сервери и други нешта поврзани со изградбата на дата-центри за да ја поттикнат побарувачката за ВИ. Но постојат знаци дека пазарот станува скептичен дали трошоците за технологија што сè уште не е докажана се оправдани. Некои бизниси се жалат дека е тешко да се измери заштедата што се постигнува со користење ВИ за рутински задачи и напоменуваат дека технологијата уште прави грешки, кои можат скапо да чинат, пишува „Информејшн“.
Една продажна единица на „Мајкрософт“ побарала од продавачите да ги зголемат цените за клиентите за 50 отсто на Фаундрај (Foundry) во последната фискална година, пишува „Информејшн“. Но помалку од една петина од продавачите во таа единица ги исполниле своите цели, па во јули „Мајкрософт“ ја намалил целта на околу 25 отсто раст за тековната фискална година во споредба со претходната, се наведува во извештајот.
Фаундрај е платформата на „Мајкрософт“ за продажба на модели на вештачка интелигенција и алатки за изградба и имплементација на автоматизирани ВИ-агенти. Таа е одвоена од производите на компанијата со брендот Копилот, кои се главен канал за продажба на алатки со ВИ за канцелариски работници. Голем дел од побарувачката за алатки поврзани со ВИ доаѓа директно од „Опен еј-ај“ (OpenAI), што е посебна гранка од моделот на Фаундрај.
.webp){kind=icon}
