text size
Во 2023 година Горјан Јовановски и неговиот партнер Драган Гелевски ја промовираа најголемата платформа за климатски податоци во светот EarthCare.ai. Станува збор за платформа што овозможува подостапен, централизиран пристап до климатските податоци и неопходните информации за животната средина на светско ниво.
А Јовановски е основач на популарната апликација што го следи квалитетот на воздухот. Во Македонија првично позната како „Мој воздух“, подоцна се ребрендира во AirCare, проширувајќи се во околните балкански земји, а потоа и низ светот. Така почна приказната.
Во меѓувреме како соосновач му се приклучи и најверниот школски другар Драган Гелевски, а апликацијата растеше добивајќи признание од Обединетите нации и внимание од голем број реномирани медиуми како „Гардијан“, „Асошиејтед прес“, Би-би-си...
Во мај, во конкуренција на 700 други стартапи, AirCare влезе во 12-те најдобри што во 2023 година станаа дел од светскиот акцелератор за стартап-компании Techstars во Берлин. Techstars e најголемиот pre-seed инвеститор во светот, со портфолио од 3.700 стартапи вредно 98,4 милијарди долари. Креаторите присуствуваа во тримесечна посета на Берлин, каде што покрај менторството, Techstars инвестира во AirCare и 120.000 долари во pre-seed рунда.
Благодарение на искуството во Techstars, AirCare пивотираше во EarthCare.ai. EarthCare нуди трансформирање на начинот на кој бизнисите доаѓаат до податоци за животната средина и климата, што практично им дава поддршка при носењето бизнис-одлуки приспособливи на климатските промени.
.webp){kind=icon}
