Пролетно мени за душата: најновите книги, филмови и серии

Универзумот функционира како „космичка кујна“ со бескрајно богато мени, кое само чека да ги добие вашите нарачки и да ви ги испорача. Но зошто понекогаш таа кујна ни испорачува само лимон и што да правиме кога ќе се случи тоа? Вака Марк Виктор Хансен, коавтор на еден од најпродаваните светски бестселер-серијали за бизнис „Пилешка супа за душата“, ја најавува книгата „Нарачување од космичката кујна“ од Патриша Крејн.

Ако ви се чини дека лимонот се појавува сè почесто на менито, двете книги се добар водич како барем да направите лимонада. На изборот на прирачници за успех во бизнисот, но и на други полиња, се придружува и „Кој ви го чува грбот“ од Кит Фераци. Фераци, светски признаен лидер во иновативни идеи, консултант и автор, покажува дека за постигнување успех на кое било животно поле е неопходно да имаме тим на доверливи советници што ќе ни дадат поддршка и ќе бараат одговорност за да ги оствариме поставените цели. Затоа, докторите имаат стручни тимови, директорите управни одбори, врвните спортисти тренери, а претседателите кабинети.

Книгата, чиј оригинален наслов е „Никогаш не јадете сами“ (Never Eat Alone), го поставува прашањето како да ги најдеме луѓето што ќе ни го променат животот. Авторот советува да имаме барем тројца такви луѓе, а за оние со менталитет „сè можам сам“ ќе биде интересно да дознаат како градењето контакти и мрежа на поддршка може да им помогне во нивните цели.

На скромна нота, може да се каже дека и само една личност од трите во мрежата може да внесе позитивна промена во вашиот живот - или барем да биде добар партнер во приватната сфера, друштво за кино или за филмски маратон дома. Кога сме кај тоа, филмовите што следуваат носат разновидност и иновативен пристап кон познатите приказни.

Филмови

„Невестата“ (The Bride!) е готик хорор-комедија на Меги Џиленхол, која ја реинтерпретира приказната за Франкенштајн и ја сместува во Чикаго во 1930-тите. Осаменото чудовиште (Кристијан Бејл) ја ангажира амбициозната научничка (Анет Бенинг) да му создаде придружничка од убиена жена (Џеси Бакли), што води кон хаотична, жанровски сложена приказна за љубов, бунт и чудовишна слобода, која станува културен феномен. Филмот вешто ги спојува елементите на хорор, криминал, мјузикл и општествени коментари, додека оживеаната невеста и Франк бегаат како отфрлени љубовници, инспирирајќи радикално движење и спојувајќи ги личните драми со пошироки општествени прашања.

Кристијан Бејл како осамено чудовиште во филмот „Невеста“ Depositphotos

Долгоочекуваното продолжение на „Ѓаволот носи Прада“ ја следи главната уредничка на магазинот „Ранвеј“ (Runway), Миранда Присли (Мерил Стрип), додека се обидува да се снајде во светот во кој печатеното новинарство исчезнува. Нејзината поранешна млада асистентка Емили Чарлтон (Ен Хатавеј) сега е влијателна менаџерка во моќна рекламна групација, додека Присли очајно има потреба од пари. Филмот носи напната динамика меѓу стариот и новиот свет на модата и прашањето како ќе изгледа светот каде што позициите на моќ се заменети. Излегува на 20 април.

Мерил Стрип во улогата на строгата уредничка Миранда Присли Depositphotos

Следуваат и други големи кинески спектакли. Продолжението на анимираниот филм „Браќата Супер Марио“ (Super Mario Bros. Movie) доаѓа на почетокот од април, додека епската адаптација на Хомеровата „Одисеја“, во режија на Кристофер Нолан, доаѓа во јули. Со проценет буџет од 250 милиони долари, ова е неговиот најскап филм во кариерата, но и прв што е целосно сниман со филмски камери „ајмакс 70 мм“ (IMAX 70 mm), што ветува визуелно спектакуларно искуство. Филмот го следи Мет Дејмон во улогата на Одисеј, крал на Итака, додека го прави неговото долго и опасно патешествие кон дома по Тројанската војна, обидувајќи се повторно да се обедини со сопругата Пенелопа, која ја толкува Ен Хатавеј.

Јуни ја носи „Супергрл“ (Supergirl), приказна за хероината роднина на Супермен, која се соочува со сопствени трауми додека го брани меѓугалактичкото право. Џејсон Момоа го толкува главниот негативец.

Исто така во јуни доаѓа и адаптација на франшизата „Господари на универзумот“ (Masters of the Universe), додека јули носи трет дел од анимираната франшиза „Мињони“ (Minions), подготвен да ги одведе семејствата и најмалите гледачи на нова авантура со симпатичните жолти херои.

Стриминг

Обожавателите на бестселерите на Патриша Корнвел чекаат од 1990 година д-р Кеј Скарпета да се појави на малите екрани. Никол Кидман ја толкува главната форензичарка, која се враќа дома за да открие сериски убиец, додека Џејми Ли Кертис ја игра нејзината сестра Дороти во ТВ-серијата „Скрапета“ (Scarpetta).

Елизабет Мос, Кејт Мара и Кери Вошингтон ги играат трите најдобри пријателки чиј живот тотално се менува кога главната хероина Маријана ненадејно умира, откривајќи скриени тајни и непредвидливи последици. Острата психолошка драма „Несовршена жена“ (Imperfect Women), адаптација на романот на Араминте Хол, ветува напната и интелигентна приказна за пријателство, предавство и мистерија.

Никол Кидман како форензичкиот патолог Кеј Скарпета во претстојната серија „Скарпета“ Amazon

Убиството на Абрахам Линколн останува еден од најважните настани во американската историја, а серијата „Менхант“ (Manhunt) го следи Едвин Стантон, воениот секретар на Линколн, во неговата истрага да го најде Џон Вилкес Бут, убиецот на претседателот.

Бут успеал да избега по извршеното злосторство пред публика, додека серијата прикажува наводна заштита од страна на Конфедерацијата и масовната потрага по него. „Менхант“ во три дела драматизира историски факти и ги обликува во напнат крими-трилер, откривајќи детали за едно од најсложените и најмалку разбрани злосторства во историјата на САД.

За љубителите на документаристика, мини-серија на Нетфликс нуди вистинско задоволство: „Тикток-убиецот“ (The TikTok Killer), кој го отвора светот на дигитални траги, социјални мрежи и современ криминал.

Серијата во две епизоди го следи мистериозното исчезнување на 42-годишната Естер Естепа во Шпанија во 2023 година, откако на патување го запознала популарниот тикток-инфлуенсер познат како Монтиља. Преку внимателно реконструирани видеоснимки и пораки што оставиле дигитална трага, семејството на исчезнатата жена се обидува да ги реконструира нејзините последни моменти и да ја разбере динамиката на односите пред нејзиното исчезнување.

Документарецот за убиецот од Тикток повикува на критичка анализа на информациите на социјалните мрежи Depositphotos

Убиецот Монтиља, кој по излегувањето од затвор во 2013 година создава тикток-профил под името Динамита Монтиља (Dinamita Montilla), ги користи социјалните мрежи за јавно да тврди дека е невин и истовремено апелира до своите следбеници да ја бараат Естепа. Серијата покажува како дигиталниот свет се преплетува со реалниот, кога снимките и пораките стануваат клучен доказ во истрагата. Монтиља често самиот ги повторува истите рути во потрага по жртвата, кои ги следи и нејзиното семејство, обидувајќи се да ги вклучи следбениците во потрагата. Во реалниот живот, Монтиља е во затвор и сè уште чека судење за овој случај.

Приказната, освен што внесува вознемиреност, ја отсликува важната тема: како технологијата, социјалните мрежи и виралните содржини можат да станат извор на манипулација и конфузија. Преку „Тикток-убиецот“, гледачите ја гледаат моќта на дигиталните траги како меч со две сечила: тие обезбедуваат транспарентност и можност за следење, но истовремено покажуваат колку е лесно да се контролира наративот во јавниот простор.

Без разлика дали избирате дигитален или аналоген свет, делата на поп-културата во наредниот период ни порачуваат дека моќта не лежи само во информациите што ги поседуваме туку и во нашата способност критички да ги анализираме и поврзуваме и да ја согледаме пошироката слика. Најдобро, секако, во друштво.