.webp){kind=icon}
Регионот што закрепна последен од пандемијата сега е во врвот на побарувачката, но овие скапоцености остануваат релативно без метеж.
Пусан, Јужна Кореја
Пусан често се нарекува Мајами во Јужна Кореја поради песочните плажи, опуштената атмосфера и културното влијание, кои заедно со туризмот експлодираа од октомври 2023 година, откако музичката група БТС го одржа овде својот „последен“ концерт. (Популарната К-поп група моментално е на пауза, а нејзините членови се официјални амбасадори на градот.) Списанието за луксузни хотелиери истакна: „Отворањето на хотелот ’Виндам гранд’ го обележи ноември“. Првиот објект на овој врвен бренд отворен во Јужна Кореја има 271 соба на плажа, луксузен спа-центар и модерен кинески ресторан „Фунгвеи“. Хотелот е блиску до најголемиот рибен пазар во земјата, „Јагалчи“, со цела низа тезги со свежа риба и морски плодови, кои може да се приготват по нарачка во еден од многуте ресторани на катот.
Ако сакате да останете во градската верзија на Саут Бич, упатете се кон Хаундае, каде што хотелот „Гранд Џосун Пусан“ нуди 330 прозрачни соби на плажа, од кои повеќето имаат поглед на Јапонско Море. Предвидено е и отворање нови хотели од синџирите „Банјан три“ и „Лоте хотелс енд рисортс“.
Во Пусан одат луѓе што бараат нешто повеќе од сонце и море. Градот брзо станува мека за готвачите и за љубителите на ресторани. Првиот водич „Мишелин“ за градот, кој ќе биде објавен годинава, секако ќе го вклучи познатиот ресторан „Борн енд бред“, кој се фокусира на јадења на скара што се приготвуваат пред гостите: нарачајте што било од говедско ханву (hanwoo), скапо говедско месо со висок процент на интрамускулна маст (marbling), кое не може да се најде надвор од Кореја. Напролет Пусан повторно ќе биде домаќин на вистинско сведоштво за креативната сцена на кафето во овој град – Светското првенство за бариста. Барате место каде што може да испиете шолја најдобро кафе? Задолжително посетете го „Момос“, мал локален синџир со сопствена најсовремена пржилница за кафе, со листа на неконвенционални пијалаци, како „кенди“ со вкус на портокал, и персонал од вистински волшебници за кафе, во чиј состав е и шампионот на првенството за бариста од 2019 година.
Хонгконг
Од април минатата година Хонгконг полека се буди по четиригодишната политичка репресија и ограничувања поради пандемијата на ковид-19. Земјата очекува целосно закрепнување на туризмот до крајот на 2024 година.
Посетителите ќе најдат град што е подготвен повторно да процвета, особено во областа Коулун во пристаништето Викторија, каде што хотелот „Роузвуд Хонгконг“ со 322 соби и услуга од батлер го предводи подемот на квартот Цим Ша Цуи. Станува збор за страстен проект на семејството на тајкуни Ченг, кое стои и зад впечатливиот трговски центар „K11 Музеа“ во соседството. (Хотелот „Роузвуд“ го зазеде второто место на првата листа на 50 најдобри хотели во светот во 2023 година.) Во истиот дел од градот има и конкуренти со попристапни цени, вклучувајќи и хотели од синџирите „Кимптон“ и „Мондријан“.
Секоја посета на Хонгконг треба да се фокусира на новите градби, како што се распространетите тревници во пристаништето од културната област Западен Коулун, проект вреден повеќе милијарди долари, кој се развива повеќе од 20 години. Тука се истакнува „М+“, центар за современа уметност со 33 галерии во кои се изложени уметнички дела од кинеската и азиската дијаспора, како и Музејот на палатата во Хонгконг, со атрактивни кралски експонати од Забранетиот Град во Пекинг. Во централниот дел на градот се очекува да биде отворен коктел-барот „Кинсман“, кој нуди алкохолни пијалаци произведени во Хонгконг, како што е „јук бинг сиу“, оризово вино натопено со свинска маст. Клупскиот ресторански комплекс „Форти-фајв“ со својот раскошен ресторан „Кристал рум бај Ана Софи Пик“, кој е отворен во соработка со производителот на кристали „Бакарат“, цели кон ѕвездите („Мишелин“).
WILSON LEE ЗА BLOOMBERG BUSINESSWEEK / Барот „Дарксајд“ во хотелот „Розвуд“ во Хонгконг
Кенгурскиот Остров
Коалите, морските лавови, валабите, извонредните карпи и истоимените торбари по кои островот го добил името се некои од причините поради кои Кенгурскиот Остров се нарекува австралиски Галапагос. Речиси 40 отсто од островот изгоре во пожарите во 2019 и 2020 година, вклучувајќи го и хотелот „Саутерн оушн лоџ“, легендата на австралиското гостопримство со шест ѕвезди. Но во 2024 година сè се враќа во живот, па и хотелот. Реновираниот хотел штотуку беше отворен во декември, а неговите 23 посебни апартмани, сместени меѓу драматични варовнички карпи, гледаат кон океанот и имаат пространи тераси, џакузи и камини без чад.
Има и поприфатлива понуда, вклучувајќи го и еколошкиот комплекс „Кабн Х“, кој се состои од пет модернистички куќички со сауни. Комплексот се наоѓа на источниот дел на островот, блиску до терминалот за траекти што го поврзува Кенгурскиот Остров со Аделаида. Во план е уште поатрактивно сместување: се очекува во 2025 година да биде отворен хотелот „Клифс“, на врвот на карпа стара 500 милиони години, кој особено ќе им се допадне на љубителите на голфот.
Што се однесува на извонредните карпи, тие се главната атракција на националниот парк Флиндерс Чејс, во кој во јануари ќе биде отворен соларен центар од 19,5 милиони австралиски долари (13,3 милиони долари), опремен со полначи за електрични возила, системи за собирање дождовница и зелен пазар. Сето тоа го означува почетокот на следното одржливо поглавје за дестинација што придонесува за австралиската економија во просек 187 милиони австралиски долари (13,4 милијарди долари) годишно и на многу начини ја претставува иднината на земјата.
Палау
Палау, државата со повеќе од 340 острови, која се протега меѓу Филипините и Папуа Нова Гвинеја, е примамлива со бујните џунгли и 4.000 години старата микронезиска култура. Меѓутоа, под морето се крие уште поголемо богатство. Иако долго време е прочуена како една од најдобрите светски дестинации за нуркање, Палау досега беше многу тешко да се посети. Повеќето туристи од бродови ги истражуваа сините бездни и коралните гребени полни со големи ражи и медузи. Но земјата започна амбициозна кампања, со која настојува да го зголеми бројот на посетители и да го подигне нивото на луксузен туризам.
Новата национална авиокомпанија „Али Палау“ започна да лета од Сингапур во ноември 2023 година, а во последниве месеци регионалните авиопревозници „Ер Ниуџини“ и „Науру ерлајнс“ додадоа летови од Бризбејн, Австралија. Во однос на сместувањето, „Фор сизнс“ настапува храбро на архипелагот, правејќи го постојана база за својот прв „пловечки хотел“, јахтата наречена „Експлорер“. Компанијата ќе користи глисери за превоз на гостите до и од бродот со три палуби, со 11 апартмани, така што ќе можат да се пријават или одјават во секое време, слично како во обичен хотел, сè додека хотелот плови низ заштитена морска област каде што нуркачите можат да нуркаат или да набљудуваат сиви гребенски ајкули. Не сакате крстосување? Групата на хотели „Интерконтинентал“ ќе го отвори хотелот „Индиго Палау“ во втората половина на 2024 година, со 200 сместувачки единици, веднаш до атрактивниот корален гребен кај островот Малакал, до кој може да се пристапи со автомобил од главниот остров Корор.
