Како извршните директори ја оптимизираат својата рутина за спиење

Добре дојдовте во „Менаџери лично“, рубрика во месечникот „Блумберг бизнисвик Адрија“ во која директорите од целиот свет ни кажуваат како управуваат со своето време во и надвор од канцеларијата. Веќе дискутиравме на многу теми, на пример за нивните рутини за вежбање, омилени модни униформи, како го поминуваат викендот или каде бегаат на краток одмор.

Овој месец прашањето за менаџерите е тоа што ги преокупира речиси сите: Како да се оптимизира сонот? Одговорите се инспиративни: од ноќни ритуали и режими на витамини до микромедитативни сесии, полноќни прошетки и полчасовни бањи. Но се негува и заспивањето „на старомоден начин“.

Д-р Весна Милошевиќ Жупанчиќ, стручна директорка на словенечкиот „Е-студент сервис“ (e-Student Service), експертка за млади и пазар на труд, го гледа квалитетниот сон како клучен дел од регенерацијата што ѝ овозможува да биде задоволна и ефикасна и на работа и дома. „Се трудам да посветам седум часа на спиење секоја вечер. Покрај активниот ритам на работа, децата и спортот најмногу придонесуваат за заморот, па затоа заспивам без проблеми неколку минути откако ќе ја ставам главата на перницата“.

За Крсто Златков, основач на првиот самостоен Кариерен центар во Македонија, ноќта не е период од денот единствено за одмор туку првично за анализа на денот што изминал, барање решение за предизвиците и проблемите од работните часови, па дури потоа релаксација.

Крсто Златков, основач на првиот самостоен Кариерен центар во Македонија Приватна архива

 

„Мене најубав период ми е ноќта, кога сѐ е тивко, па по денот минат во постојана оператива се насочувам на анализа во тивка инспиративна атмосфера. Тогаш, ако треба, слушам поткасти или читам стручна литература“, вели Златков, но посочува дека тоа претставува и своевиден проблем за неговото спиење откако веќе сериозно го ангажирал мозокот, па често знае и по полноќ да излезе надвор и да прошета половина час за да ги „доистроши“ мислите и физички да се измори за полесно да заспие. Кон ова тој додава и уште барем половина час посветеност на лична хигиена во бањата за комплетно опуштање пред спиење. „Во тој период се обидувам целосно да се тргнам од екраните и телефонот“, вели Златков.

Marine Buffard / BBWA

 

Како извршен директор на „Убер технолоџис“ (Uber Technologies Inc.), Дара Косровшахи работи во свет со изобилство време поминато пред екран; не чуди што тоа порано беше дел од неговиот режим на одмор. „Носев паметен уред за следење на здравјето што го оценуваше мојот сон и апсолутно го обожавав“, вели тој. „Како некој што е навистина заинтересиран за податоци, добивањето детални сознанија беше токму по моја мера“. Но, на крајот, вели тој, „претерав малку, натпреварувајќи се со себе секоја вечер“.

Денес тој користи сосема поинаков трик за спиење. „Се вратив на заспивањето на старомоден начин – без следење, само читање“. Неговиот совет? „Ослободете се од екраните и ќе бидете чекор понапред“.

Marine Buffard / BBWA

 

„Имав среќа што отсекогаш можев да спијам и покрај моите 20 кафиња еспресо дневно“, се шегува Константин Сидоров, извршен директор на Лондонскиот технолошки клуб, фонд за ризичен капитал со седиште во Велика Британија. (Неговото најново лансирање, во мај, беше „VC Secondary Fund“ од 250 милиони долари.)

„Обично останувам доцна на вечера со друштво и добро вино, што сум сигурен дека помага.“ На спротивниот крај од спектарот се наоѓа уште една од неговите тајни за спиење: да остане активен. „Без разлика колку ми е зафатен распоредот, секогаш вежбам барем двапати неделно - каде и да сум во светот.“ Сидоров го користи својот зафатен распоред за патувања и за да дремне: „Немам проблем да спијам во авион, патувајќи до и од нашите инвеститорски центри во Хонгконг и Дубаи“.

Во 2024 година Рејни Вилијамс, извршна директорка и соосновачка на „Беверли Хилс естејтс“ (Beverly Hills Estates), затвори продажба на куќи вредна над 1,3 милијарда долари; нејзини клиенти се актерите Џереми Ренер и Анџелина Џоли, како и инвеститорот Брус Маковски.

Сонот е неизоставен, според неа, па затоа развила многу специфична рутина за да ѝ помогне да го максимизира. „Земам магнезиум, цинк и АТП (додаток за клеточна енергија), заедно со балансер на кортизол, за да помогнам во регулирањето на нивото на стрес.“ И тоа е само почетокот. „Опуштено туширање, проследено со целосен режим за нега на кожата и самогрижа, му помага на моето тело да сигнализира дека е време за одмор“, вели таа. „Често водам дневник за да го разбистрам умот и секогаш вклучувам вежби за длабоко дишење за концентрација пред спиење. Неколку ноќи во неделата практикувам и медитација.“

Marine Buffard / BBWA

 

Тони Тјан е извршен директор на „Минилукс“ (MiniLuxe Inc.), национален бренд за нега на нокти што нуди услуги за нокти и тело и нетоксични производи, кој донесе над 26 милиони долари приходи во 2024 година. Сонот не е специјалност на Тјан, но тој вели дека се обидува да се подобри. „Најголемата промена е рутината што вклучува микросесија на медитација со звучен сад“, вели тој. „Потоа, порано одење в кревет и супер рано станување. Никогаш нема да заборавам една изрека што Том Брејди еднаш ја сподели со мене: Не можете наутро да се вивнете високо со орлите ако доцна навечер викате со бувови!“!

Групацијата „Карлсберг“ (Carlsberg) произведува пиво во Копенхаген од 1840-тите. Пред две години Јаков Аруп-Андерсен ја презеде функцијата извршен директор на „Карлсберг А/С“ (Carlsberg A/S), чија пријавена заработка за 2024 година достигна речиси 11 милијарди долари. Еден од неговите моментални приоритети е проширување на портфолиото на безалкохолно пиво на компанијата, што го дополнува неговиот личен фокус на здравјето: „Ако се разбудам порано од планираното, не се борам против тоа. Станувам и го почнувам денот. Обидот да си наметнам повеќе сон често ме остава зашеметен и го нарушува мојот ритам, и тоа со денови.“ Наместо тоа, вели тој: „Го користам тоа дополнително време за вежбање или трчање, што ми помага да се ресетирам и длабоко да спијам следните ноќи. Станува збор за слушање на сопственото тело.“

Marine Buffard / BBWA

 

„Ова можеби звучи контрапродуктивно, но мојот најдобар трик за добар ноќен сон е да одвојам време за дремка – најмалку 40 минути на ден“, вели Мајкл Кирбан. Тој е соосновач и извршен претседател на „Вита коко компани“ (Vita Coco Company Co.), популарен бренд за кокосова вода. Во 2024 година „Вита коко“ достигна продажба од 516 милиони долари од своите пијалаци во кутија. За дремките, Кирбан продолжува: „Тие ми помагаат полесно да го исклучам мозокот кога си легнувам навечер“.

Амина Белуиздад Портер е извршна директорка на ПС (PS), што е кратенка од „Private Suite“, и управува со приватни терминали на аеродромите во Лос Анџелес и Атланта, кои им овозможуваат на клиентите да поминат низ приватни безбедносни системи пред да бидат придружувани до авионите; локациите во Далас и Мајами е планирано да се отворат следната година. Дури и додека ја проширува својата компанија на национално ниво, Портер му дава приоритет на своето време за одмор. „Конечно престанавме да се фалиме со тоа дека не спиеме. Целта ми е да обезбедам конзистентни седум-осум часа сон секоја вечер. Тоа е неизбежно.“

 

Во пишувањето на текстот учествуваа: Урбан Червек, Кејт Кредер, Ањишка де Суз, Лорен Тавенер, Ники Екштајн