text size
Дата-центрите за вештачка интелигенција (ВИ) можеби се огромни, но вистинската работа во нив се одвива на микроскопско ниво. Ситни мотори зујат додека придвижуваат мали вентилатори, а млазови течност тенки како конец минуваат низ бакарни плочи за да ја држат под контрола топлината што се создава при компјутерската обработка. Компонентите што го овозможуваат сето тоа се минијатурни ремек-дела на инженерството, кај кои и микроскопски промени можат да доведат до целосен прекин на работата.
Со секоја нова генерација чипови за ВИ расте и потребата од овие компоненти. За серверските кабинети, за кои некогаш беа потребни десетици оптички врски, денес се потребни десетици илјади. Тесни грла се појавуваат насекаде - од мемориските чипови до батериските системи. Оваа ненадејна потреба од милијарди толку ситни делови создаде огромни можности за компаниите што ги произведуваат, но и нови предизвици.
Оптички кабли
Клучна компонента на секој дата-центар се оптичките кабли, односно тенките стаклени влакна што пренесуваат податоци со помош на светлосни импулси. Бидејќи вештачката интелигенција обработува огромни количества податоци, дата-центар за ВИ бара многу повеќе оптички кабли отколку конвенционален облачен центар. Компаниите што можат да одговорат на оваа побарувачка остваруваат огромни добивки. „Корнинг“ (Corning Inc.) потпиша договор за снабдување вреден шест милијарди долари со „Мета“ (Meta Platforms Inc.), како и договор за купување акции со „Енвидија“ (Nvidia Corp.) во вредност од 500 милиони долари. Акциите на „Фуџикура“ (Fujikura Ltd.) скокнаа за повеќе од 500 отсто во изминатите 12 месеци, додека акциите на конкурентската компанија „Фурукава електрик“ (Furukawa Electric Co.) пораснаа за повеќе од 800 отсто.
Повеќеслојни керамички кондензатори
Даниеле дел Плато/Bloomberg Businessweek
Зголемен приказ на слоевите на кондензаторот/Даниеле дел Плато/Bloomberg Businessweek
Овие компоненти го стабилизираат напонот во серверите за ВИ така што ја испорачуваат електричната енергија до чиповите кога им е потребна, а ја апсорбираат кога нема потреба од неа. Секој повеќеслоен керамички кондензатор (МЛЦЦ) е помал од зрно песок, но содржи стотици наизменични слоеви керамика и метал, кои се пресуваат и се печат во монолитен блок на температури повисоки од 1.000 Целзиусови степени.
Еден сервер на „Енвидија“ (Nvidia Corp.) може да содржи 30.000 МЛЦЦ-кондензатори, додека цел еден серверски кабинет за ВИ може да има и до 440.000. Големите американски даватели на облачни услуги нагло ги зголемуваат трошоците за овие компоненти, но понудата веќе заостанува зад побарувачката. „Мурата“ (Murata Manufacturing Co.), која држи 45 отсто од пазарот на МЛЦЦ-кондензатори за најсовремените сервери за ВИ, наведува дека побарувачката од клиентите е речиси двојно поголема од количествата што може да ги произведе за една година. Роковите за испорака се продолжени на 20 до 30 недели.
Лежишта за мали челични топчиња
Даниеле дел Плато/Bloomberg Businessweek
Вентилаторот во серверскиот кабинет се врти со брзина од 20.000 вртежи во минута и е проектиран да работи 24 часа дневно, со години. Во неговото јадро се наоѓаат од две до четири топчести лежишта, секое со надворешен пречник од 10 милиметри или помалку, во кои ситни, полирани челични топчиња се движат по тенок слој маст.
„Минебеа Мицуми“ (Minebea Mitsumi Inc.), чии лежишта се вградуваат и во механизмите што ги придвижуваат главите за читање и запишување кај хард-дисковите (станува збор за механичкиот склоп што прецизно ја поместува рачката со магнетната глава над ротирачките плочи за да се запишуваат или читаат податоците, заб. прев.), како и во пумпите за течно ладење, ги произведува повеќето од најмалите топчести лежишта во светот.
.webp){kind=icon}
