Странците доаѓаат за разубавување, за болните нема место во болниците

Едно октомвриско утро Џули Милер излезе од такси пред 16-катница во луксузниот кварт Гангнам, каде што се изведуваат различни естетски зафати. Четириесет и шестгодишната жителка на Њу Џерси пристигнала во петдневна посета со намера да ги посети старите царски палати во Сеул и силно чуваната граница со Северна Кореја, но и да се подмлади. Откако влегла во клиниката „Реново скин“, една Корејка ѝ понудила кафе и колачи на совршен англиски јазик. Менаџерот на клиниката потоа ја одвел на скенирање за да се утврди колку нејзината кожа е мрсна и еластична, како и дали има брчки, пори, дамки од сонце и други промени.

Клиниката нуди широк спектар на услуги: филери и инјекции за намалување на маснотиите, ласерски третмани за подмладување на кожата и неинвазивни методи за подигнување на лицето. Милер се одлучи за инјекции на ботокс и терапија со ултразвук со висока фреквенција за да ја затегне кожата. Сето тоа чинеше околу 3.000 долари. Не е евтино, но е најмалку 40 проценти поевтино отколку во САД, што е важно, имајќи предвид дека осигурувањето обично не ги покрива трошоците за такви интервенции. „Се надевам дека ќе го вратам времето малку назад“, вели таа. „Покрај тоа, не беше тешко да се донесе одлуката за тоа бидејќи е подостапно отколку овде, отколку кај нас во САД“.

Милер е една од стотиците илјади жители на САД, Европа и Азија што доаѓаат во Јужна Кореја за различни естетски интервенции, од липосукција до понапредни интервенции, како третмани со матични клетки. Во Јужна Кореја, здравствениот и естетскиот туризам, кој вклучува сè, од третман против рак до дермални филери, генерираше повеќе од 2 милијарди долари приход во 2023 година, според фирмата за истражување на пазарот „Иматк груп“. Владата го гледа овој сектор како важен двигател на растот, при што бројот на пациенти во 2023 година се зголеми повеќе од двојно, на 600.000.

Woohae Cho/Bloomberg

Сепак, додека овој сектор е во подем (само во Гангнам има стотици клиники за естетска хирургија), земјата со 52 милиони луѓе се соочува со здравствена криза. Поради исцрпувачките услови за работа во болниците и недостигот од медицински персонал, практикантите стапија во штрајк. Додека лекарите ги напуштаат болниците за попрофитабилната работа да лекуваат странци, болниците се принудени да ги отфрлат тешко болните пациенти. „Здравствениот систем е во голема криза и тоа е неповратно“, вели Ин Сук Парк, пензиониран педијатар кардиолог и поранешен член на јужнокорејскиот парламент. „Владата сега мора да ја направи здравствената заштита приоритет“.

Бројот на естетски хирурзи што работат во приватна ординација во Јужна Кореја е речиси двојно зголемен, на повеќе од 2.700, што е најголем број на естетски хирурзи по жител во светот, покажуваат податоците на Меѓународното здружение за естетска хирургија. Јужна Кореја е светска престолнина на естетската хирургија, со девет процедури на 1.000 луѓе регистрирани во 2021 година, според глобалната платформа за статистика и анализа „Статиста“.

Трендот што е присутен во светот е особено изразен во Јужна Кореја. Иако повеќето лекари во болниците обично се добро платени, тоа доаѓа со прекувремена работа и непроспиени ноќи. Естетската хирургија нуди можност за поголема заработка и помалку бурен распоред. Во САД, на пример, дерматолозите заработиле во просек 469.000 долари во 2023 година, речиси двојно повеќе од педијатрите, според податоците од „Доксимити“, компанија што обезбедува платформа за поврзување медицински професионалци. Според официјалните податоци од 2021 година, дерматолозите во Германија можат да заработат 344.000 евра (358.000 долари), додека општите лекари заработуваат 292.000 евра.

Јужна Кореја не е сама во желбата да профитира од здравствениот туризам. Тајланд, кој стана главна дестинација за луѓето што бараат различни здравствени услуги, од третман за неплодност до редовни прегледи, се очекува да забележи уште поголем прилив на странци откако властите почнаа да издаваат едногодишни визи за пациентите во 2022 година. Малезија ја посетиле 850.000 медицински туристи во 2022 година, што е зголемување од 52 отсто во однос на претходната година. Сингапур исто така бележи раст, додека Кина станува сѐ попривлечна за медицинските туристи бидејќи регулаторите одобруваат сè повеќе инјекции и уреди како ласери за отстранување на брчките, според консултант од „Дилојт“.

Woohae Cho/Bloomberg

На Јужна Кореја ѝ е сè потешко да привлече медицински туристи поради политичките превирања. Земјата нема избрано лидер откако јужнокорејскиот претседател Јун Сук Јеол беше отповикан кога прогласи вонредна состојба во земјата во декември. Така веројатно ќе остане додека уставниот суд не одлучи за неговата судбина. По избувнувањето на немирите, странските државјани откажаа околу 20 отсто од закажаните прегледи во болниците во Јужна Кореја, објави Корејското здружение за промоција на медицинскиот туризам.

Извештаите за неуспешни естетски операции во Јужна Кореја исто така предизвикаа загриженост. Поради брзиот раст на индустријата што им нуди на туристите инјекции со ботокс од шест долари и третмани по барање, некои јужнокорејски клиники му ја препуштаат својата работа на неискусен персонал. Тоа резултираше со повреди, па дури и со смртни случаи. Поради тоа, јужнокорејската влада неодамна донесе регулатива со која се бара инсталирање камери за снимање на процедурите извршени под анестезија.

Позната наследничка од Хонгконг почина во 2020 година откако беше подложена на липосукција и процедури за зголемување на градите во Сеул. Кинеската амбасада во Сеул во јануари минатата година издаде предупредување за опасностите од козметичките зафати, откако една Кинезинка на возраст од дваесет години почина по три процедури за липосукција извршени за помалку од две недели, објави весникот „Глобал тајмс“.

Тоа не ја спречи Амира Јилдиз секоја година да патува во Сеул на козметички третмани. Таа започна со инјекции со ботокс и со ласерски третмани во 2019 година, а со текот на годините премина на забни импланти и зголемување на градите. Германска државна службеничка поминала еден ден во октомври во клиника каде што лекарите извадиле матични клетки од нејзината крв, а потоа и ги вшприцувале во телото за да ѝ ја вратат виталноста. Таа тврди дека сега подобро спие, има повеќе енергија, а лицето ѝ свети. „Ја сакам Кореја“, вели 33-годишничката. „Ако сакате да изгледате добро и да се чувствувате добро, секогаш има нешто ново што може да ви помогне“.

Јужна Кореја несомнено има корист од здравствениот туризам и туристите како Јилдиз и Милер. Сепак, повеќе од 3.750 луѓе починале во земјата од 2017 година поради недостиг од лекари, според извештајот на јужнокорејскиот универзитет „Данкук“. Со оглед на тоа што, според проекциите, на земјата ќе ѝ недостигаат 15.000 лекари до 2035 година, властите предложија зголемување на бројот на места за студенти примени на медицинските факултети и училишта за две третини, на околу 5.000 годишно. Иако тоа ќе помогне да се реши недостигот од персонал, лекарите велат дека планот не ги решава структурните проблеми што предизвикуваат лекарите да се свртат кон попрофитабилни специјализации, како што е естетската хирургија. Речиси 13.000 лекари и практиканти во земјата штрајкуваа во февруари, а малкумина се вратија на работа.

Поради тоа, итните служби се празни, а тешко болните пациенти чекаат со месеци за прегледи. Националниот здравствен систем обезбедува квалитетна нега, но поради системот на ниски болнички такси и дневници за лекарите, многу здравствени институции се борат да опстанат финансиски. Некои практиканти се принудени да работат и по 80 часа неделно за плата што е едвај поголема од минималната загарантирана плата од шест долари на час. „Во клучните области на здравствената заштита, како што се мајчинството и интензивната нега, на лекарите не им се оддава доволно почит или не се платени соодветно“, вели Најунг Јунг, доктор што ѝ се приклучи на клиниката „Реново“ минатото лето, каде што Милер беше подложена на ботокс и фејслифтинг.

Практикувањето естетска хирургија значи и значително поголема заработка, бидејќи јужнокорејските естетски хирурзи често вршат околу десет процедури дневно. Но тоа може да доведе до заостанување, вели Тони Медина, основач на една од 1.200-те владини лиценцирани компании што им помагаат на странците да се движат низ јужнокорејскиот здравствен систем. Еднаш, што ретко се случува, еден хирург одбил повторно да му го оперира носот на незадоволен пациент, па Медина вели дека морал да најде нов лекар за да го оперира. „Има толку многу клиенти и толку многу работа што стандардите може да се намалат“, вели тој. „Ние се занимаваме со човечки лица и здравје“.

– Во соработка со Стела Ко