Смрт, даноци и Тефлон Дон

Изгледа како ниту еден скандал да не може да го потресе поранешниот, а можеби и иден претседател.

Доналд Трамп требаше да ја заврши својата кариера тој ден кога започна неговата претседателска кампања во 2016 година. Откако се спушти по златните подвижни скали од Кулата на Трамп (Trump Tower), новопечениот кандидат веднаш ги нападна мексиканските имигранти изјавувајќи: „Тие носат дрога, носат криминал, тие се силувачи“. Ужасени од ваквиот расистички спектакл, познавачите на политиката го означија како радиоактивен и чекаа да исчезне поддршката што ја уживаше. Меѓутоа, не се случи тоа. Поддршката само растеше.

Беше потребно подолго време за граѓаните и новинарите да разберат дека Трамп, преку некоја чудна алхемија на лична моќ, едноставно не подлежи на истите закони за политичка гравитација како и другите политичари. Тој е „Тефлон Дон“. Скандали какви што брзо би ја запечатиле кариерата на некој друг, не ја запечатија неговата. Зачудувачки е колку такви моменти имаше. Стручните лица прогласија крај на неговата кариера уште кога го оспори херојството на Џон Мекејн. Но ниту тогаш не се случи тоа. Луѓето бараа од него да се извини поради нападот на муслиманското семејство убиено од американскиот војник. Не се случи ниту тоа. Републиканците го напуштија кога се обелоденија видеоснимките „Акцес Холивуд“ (Access Hollywood), очекувајќи дека ќе биде принуден да се повлече. Но тој остана во трката. И победи.

Трамп е како ѕвезда од хорор-филмовите од 1980-тите години. Како Фреди Кругер од „Кошмар на улицата на брестовите“ или Мајкл Мајерс од „Ноќ на вештерките“. Невозможно е да се побегне од него. И секогаш се подготвува уште едно продолжение што со нетрпение го очекува легијата обожаватели. Прв импичмент - се враќа. Втор импичмент - повторно се враќа. Ќе го изгласате да ја напушти функцијата? Почнува притисок и обид со сила да остане на позицијата.

И кога и тоа не функционираше, Трамп не се откажа. Не побегна на терен за голф. Не се повлече, барем не за долго. Едноставно повторно се кандидираше за претседател. И сега, еве го, се врати на местото омилен политичар на републиканците, води во трката за претседателските избори пред групата анксиозни кандидати, кои изгледа чувствуваат, иако тоа никогаш не го кажаа, дека Трамп е неизбежен и дека тој никогаш нема да си отиде.

Ако постои една група од неговите уморни колеги од партиите, која уште е желна да заврши со Трамп, тогаш тоа се демократите. Сите тие навиваа минатата недела кога Елвин Брег, окружниот обвинител на Менхетн, го обвини поранешниот претседател по 34 точки за кривично дело фалсификување деловни записи во врска со тајни исплати на пари на ѕвездата од филмови за возрасни Сторми Даниелс, уште еден пример во кој политички скандал би му ја запечатил кариерата стана едвај обична пречка кога се појавија вестите за аферата од октомври 2016 година (Трамп одрекува дека имал сексуални односи со Даниелс и се изјасни дека не е виновен по сите обвиненија).

Уште еднаш, Трамп не се повлече. Наместо тоа, го направи она што секогаш го прави кога неговите постапки го доведуваат во неволја: одржа лут, пркосен, самосожалив говор што ги зазеде ударните термини на телевизиите и насловните страници во весниците. Соопштено е дека се собрани 12 милиони долари за неговата кампања во деновите по поднесувањето на обвиненијата. Дури и неговото водство за претседателските избори во рамките на Републиканската партија зајакна.

Какви и да има последици, ако воопшто претрпи последици Трамп еден ден поради правни тешкотии, се чини дека пад на политичката популарност меѓу републиканците нема да е меѓу нив. Напротив, пречките само дополнително го нагласуваат неговото присуство. Постојат добри шанси дека обвинителите се далеку од тоа дека завршиле со Трамп и дека може да бидат поднесени дополнителни обвиненија против него, да речеме во Џорџија, каде што обвинител разгледува обвинение за рекетирање и заговор поради обид да поништи изборни резултати во 2020 година, како и во Министерството за правда, каде што специјален обвинител спроведува две федерални истраги за Трамп, една за неговото ракување со доверливи документи, а друга за наводен обид да ја поништи победата на Џо Бајден.

Тоа би требало да биде доволно за да обезбеди Трамп да биде заробен во скора иднина. Секако, ако повторно ја преземе претседателската функција, ќе има уште четири години драми со Трамп. А, ако повторно изгуби, на еден или друг начин веројатно ќе биде исто.

 

Текстот го преведе Мирјана Јовеска