И додека домашната берза останува заспана, се шири алтернативен начин на инвестирање преку форма на т.н. SPV (англ. special purpose vehicle) – посебни наменски компании што обединуваат поголем број помали инвеститори за заеднички да вложат во еден проект. Иако во светот со години постои таков модел, домашната регулатива не го препознава, поради што процедурите се комплицирани, бавни и проследени со обемна документација. Сепак, инвеститорите што бараат можности надвор од недвижности, криптовалути или класична берза почнуваат да го прифаќаат.
Раде Загорац, извршен директор/Фото: Стефан Ѓаковиќ
На тој модел оваа година беше засновано и вложувањето во „Мост Ап“, белградски стартап основан во 2021 година, кој со својата апликација ги поврзува мајсторите за домаќинство со клиентите. Инвестицијата ја организираше инвестициското друштво „Сензал капитал“ (Senzal Capital) преку заедницата „Сензал алумни“ (Senzal Alumni), собрана околу едукации за лични финансии. Во оваа рунда во „Мост Ап“ вложија десетина инвеститори, а парите ќе бидат потрошени главно за маркетинг, промоција и зајакнување на развојниот тим, за апликацијата да може да ја прошири достапноста на своите услуги.
Споменатата наменска фирма сега е сопственик на дел од апликацијата, а дивиденди засега не се во план, бидејќи компанијата сè уште не е профитабилна, но целта е во иднина да се исплаќаат, кога работењето ќе достигне стабилно ниво. Исто така, евентуална долгорочна стратегија вклучува можност за продажба на поголем инвеститор.
Овој модел им овозможува на малите инвеститори да учествуваат во развојот на стартап-компании со помали суми, додека стартапите добиваат капитал, поширока сопственичка структура и поддршка од инвеститори што можат да станат амбасадори на брендот. За 2026 година се најавени нова рунда на вложувања и проширување на услугите што апликацијата ги нуди надвор од Белград, а и инвеститорите и основачите веруваат дека интересот за ваквиот вид на инвестирање во Србија ќе расте.
.webp){kind=icon}
