Одбранбената компанија „Тимтек Дифенс“ (Timtec Defense) на познатиот словенечки претприемач Иво Боскарол се фокусира на електронско војување против дронови. Создадена е како компанија за развој на заштита од дронови, „и тоа сè уште останува наша суштина“, изјави за „Блумберг Адрија“ Боскарол, кој првично делумно ја купи компанијата пред неколку години, а сега е нејзин стопроцентен сопственик. Што прави компанијата?
„Повеќето постоечки системи против дронови се базираат на блокирање на врската. Нашиот пристап е различен: развивме систем базиран на електромагнетни импулси кои физички ја онеспособуваат електрониката на целта. Не е важно дали станува збор за летачки дрон, возило, телефон или нешто друго - ако има електроника, таков систем може да го исклучи. Тоа е последната линија на одбрана кога сите други системи ќе откажат“, рече Боскарол за системот против дронови на „Тимтек“.
Иво Боскарол, сопственик на „Тимтек Дифенс“/Фото: Блумберг Адрија
Претприемачот кој порано правел дронови сега развива одбрана против нив, а се приклучил на компанијата од Внатрешна Крањска заедно со својата ќерка. „Бидејќи сум активен во авијацијата со години и работев на развој на беспилотни летала произведени од „Пипистрел“, многу сум свесен за заканата што можат да ја претставуваат нападите со беспилотни летала“, објаснува серискиот претприемач. Пазарниот потенцијал на „Тимтек“, според Боскарол, е добар, бидејќи сегашните конфликти и развојот на воена технологија и тактики што ги придружуваат покажуваат колку е неопходна таквата одбрана. Дополнителна компаративна предност на системот на „Тимтек“ е мобилноста, бидејќи системот ќе биде мобилен, па може да се постави насекаде за да покрие одредена област, или ќе може да се движи и да заштити конвој.
„Тимтек“ соработува со партнери во странство - на пример во Обединетото Кралство, каде што војската тестира на терен неколку прототипови на компанијата. Целта на ваквите тестови е да се стекне искуство во реални услови, и ако сè оди според планот, Боскарол најавува дека производството на системите против беспилотни летала на „Тимтек“ би можело да започне веќе во 2026 година. Околу една третина од развојот се одвива во Словенија. Во 2024 година, компанијата од Випавската долина пријави приход од два милиони евра и негативна добивка од 300.000 евра.
.webp){kind=icon}
