Топлотните бранови летово соборија рекорди низ планетата и со себе донесоа малку нејасни фрази. Што точно е шест сигма? За да ви го разјасниме тоа, составивме речник на поими што, за жал, сè почесто ќе ги слушаме.
Топлинска купола
Топлинска купола настанува кога топлото сончево време на одредено подрачје предизвикува области со висок притисок. Тоа ја засилува топлината и може да предизвика млазната струја, брзи воздушни струи во атмосферата, да се свие околу областа, создавајќи атмосферски феномен што може да остане во тоа подрачје со денови или дури и недели.
Предупредувања за висока температура
Националната метеоролошка служба го издава ова предупредување кога се очекува субјективното чувство за температурата, што е комбинација од измерената температура и влажност, да достигне или надмине 43 Целзиусови степени и да не падне под 24 степени најмалку 48 часа. За да се справите со топлината, ограничете го времето на отворено и пијте вода.
Температура на влажен термометар
Не е топлината она што влијае на вас. Не е дури ни влагата. Тоа е комбинација од топлината, влажноста, силата на ветрот, аголот на сончевата светлина и облачноста. За да се измери оваа комбинација, научниците го проверуваат т.н. влажен термометар, уред што ја симулира реакцијата на телото на воздухот.
Ел Нињо
Ел Нињо е природен климатски феномен што се јавува поради флуктуации во насоката на ветерот и температурата на водата во тропскиот дел на Тихи Океан и се верува дека постои многу долго време. Ел Нињо (на шпански значи „мало момче“) може да ги зголеми глобалните просечни температури и да предизвика регионални временски промени.
Depositphotos
Мегасуша
Мегасушата е период на многу ниска влажност на почвата што трае долго време. Научниците немаат прецизна дефиниција, но ја препознаваат кога ќе ја видат. Таа го погоди американскиот Запад, каде што условите од 2000 година се полоши отколку што биле во последните 1.200 години.
Црвени предупредувачки знамиња
Црвените знамиња се однесуваат на деновите што носат екстремна опасност од пожар и сè повеќе се гледаат на мапите на националните метеоролошки служби. Предупредувањето генерално укажува дека ќе биде топло, ветровито и суво. Со други зборови, сите елементи за експлозивен пожар на едно место. Сè што е потребно е искра.
Огнена бура
Огнените бури се случуваат кога интензивните шумски пожари го прегреваат воздухот, предизвикувајќи негово подигнување. Карактеристичен белег на огнената бура е пирокумулонимбус, висок облак, обично без дожд. Овие бури можат да распламтат жар, а понекогаш дури и да предизвикаат огнено торнадо.
Depositphotos
Шест сигма
Научниците го означуваат отстапувањето од нормата со сигма или стандардна девијација. Колку е поголема сигмата, толку е поредок одреден климатски настан. Со две сигми се невообичаени, со три сигми се ретки. Неуспехот на морскиот мраз на Антарктикот да закрепне се нарекува настан од шест сигма - нешто што се случува еднаш на секои 7,5 милиони години.
Студии за атрибуција
Научниците знаат дека климатските промени играат улога во високите нивоа на топлина низ светот. Студиите за атрибуција се алатка што им овозможува да квантифицираат колку е голема таа улога. Користејќи климатски модели, истражувачите можат да го симулираат и анализираат денешниот и прединдустрискиот свет и потоа да ги видат разликите.
Масовна смртност
Екстремната топлина претставува ризик за речиси секое живо суштество на Земјата. Иако не постои дефиниција за масовна смртност во контекст на климатските промени, продолжените периоди на невообичаено високи температури во последниве години придонесоа за масовно изумирање на дрвја, корални гребени и живот во океаните.
.webp){kind=icon}