„Бајненс“ доби тужба од семејства на жртви на Хамас

Mајка oд САД што беше земена како заложничка од Хамас во Газа и роднините на двајца мажи убиени по нападот на терористичката група на 7 октомври го тужат криптогигантот „Бајненс“ (Binance) за наводно олеснување на насилството.

Џудит Ранан, која беше ослободена со нејзината ќерка на 20 октомври, и роднините на Итај Глиско и на д-р Даниел Леви Лудмир, кои беа убиени од Хамас, поднесоа тужба против берзата за дигитални средства, како и против Иран и Сирија, во федералниот суд во Менхетн во средата.

Се чини дека тоа е првиот граѓански случај во она што се очекува да биде бран од судски спорови насочени кон Хамас и неговите мрежи по нападот на терористичката организација и масовното киднапирање што ги предизвика тековната војна со Израел.

Тужбата е насочена кон „Бајненс“ затоа што берзата му дозволила на Хамас да тргува на нејзината платформа. Обвинението следува по регулаторната и кривичната истрага за најголемата берза за криптовалути во светот, за која се објави минатата година. Од „Бајненс“ се изјаснија како виновни за прекршување на санкциите и законите за спречување на перењето пари што им овозможило на групи како Хамас да ги заобиколат американските банкарски регулативи. Берзата плати кривична казна од 1,8 милијарда долари и ќе ѝ се одземат 2,5 милијарди долари, додека поранешниот извршен директор Чанпенг Жао чека казна за прекршување на банкарските закони.

Официјалните лица на „Бајненс“ не одговорија веднаш на електронската порака за коментар околу најновиот спор. Адвокатот на Ранан и семејствата, Роберт Сејден, рече дека е уверен дека жртвите имаат право „да надоместат значителна штета“ според американските закони, вклучувајќи го и антитерористичкиот акт.

„Работиме на оваа тужба со недели и веруваме дека секој што помага во тероризмот треба да одговара“, рече тој во изјавата.

Според тврдењата на владата во случајот „Бајненс“, бригадите Ал-Касам, военото крило на Хамас, користеле трансакции со биткоин за да соберат пари за Палестинскиот отпор. Најмалку 1,1 милион трансакции во вредност од 899 милиони долари биле извршени од луѓе што живеат во Иран, што ги прекршува американските санкции, призна компанијата.

Помошта што „Бајненс“ му ја овозможи на Хамас придонесе во финансирањето на насилните напади и регрутирањето поединци за извршување на тие напади, се наведува во жалбата поднесена во средата.

Иран, Сирија

Според жалбата, тужителите исто така тврдат дека Иран се појавил како „главен поддржувач на тероризмот на Хамас“, зголемувајќи ги финансирањето и снабдувањето со оружје на групата во последниве години.

„Иран постојано и континуирано обезбедуваше средства за Хамас во износ од сто милиони американски долари секоја година, со цел да му овозможи на Хамас да купува оружје, да ги плати своите терористи и на друг начин да извршува терористички операции“, се наведува во жалбата.

Слично на тоа, како што тврдат тужителите, Сирија била една од „лулките на тероризмот на Хамас“ и придонела за воениот арсенал на групата во пресрет на 7 октомври. Жалбата се повикува на извештаи од печатот, јавно достапни истражувања и документи поднесени во поврзани судски случаи.

Ранан, семејството Глиско и вујкото на Лудмир, Џефри Лудмир, го тужат „Бајненс“ за помагање и поттикнување и за обезбедување материјална поддршка на терористичка организација. Тужителите бараат отштета и од Иран и Сирија, како држави спонзори на тероризмот.

Ќерката на Ранан, Натали, која и самата беше заробена две недели во Газа, и поранешниот сопруг на Ранан се исто така именувани како тужители.

Во моментов нема коментари за веста. Биди прв да коментира...

Остави коментар