Русија повторно го таргетира украинскиот електроенергетски систем

Русија уништи и оштети украински енергетски капацитети во текот на ноќта додека силите на претседателот Владимир Путин продолжуваат со нападите за да го нарушат електроенергетскиот систем на земјата. Цели на Русија беа централниот регион Дњепропетровск и Винициа, како и регионот Киев и дел од регионот Доњецк на исток, соопшти Министерството за енергетика во објава на „Телеграм“ утринава. Министерството не прецизираше каква инфраструктура е погодена.

ДТЕК, најголемиот производител на електрична енергија во земјата соопшти дека тројца работници биле ранети во нападот, кој нанел сериозна штета на една од нејзините термоелектрани. Ова беше седми напад врз електраните на компанијата во изминатите месеци, соопшти ДТЕК.

Капацитетите беа уништени и покрај тоа што Украина собори 27 беспилотни летала „Шахед“ наполнети со експлозив и пет од девет проектили лансирани од Русија во текот на ноќта, изјави командантот на воздухопловните сили Микола Олешчук.

Украинската воздушна одбрана не успеа да ги пресретне балистичките ракети „Искандер-М“ истрелани од рускиот регион Воронеж, што ја нагласува нејзината ранливост на овој вид оружје бидејќи напредните системи за противвоздушна одбрана донирани од западните сојузници на Киев се премалку за да ја покријат целата територија на земјата.

Руското немилосрдно бомбардирање на електроенергетскиот систем на Украина оваа година предизвика постојани прекини и ги остави властите да се тркаат со времето за да ја поправат инфраструктурата пред зимата, кога побарувачката за електрична енергија е најголема.

Претседателот Владимир Путин досега не покажа намера да се вклучи во украинскиот мировен план, потпишувајќи договор за воена помош со Северна Кореја и продолжувајќи на турнеја во Виетнам, наспроти критиките на САД.

Русија соопшти дека украинската војска, исто така, извршила напади со беспилотни летала во текот на ноќта врз нејзина територија. Министерството за одбрана во Москва објави дека собориле девет беспилотни летала над јужните региони Адигеја и Краснодар. Една жена загина кога беспилотно летало падна врз куќа во Славјанск-на-Кубани, град во регионот Краснодар, соопшти локалниот гувернер. Поединечни дронови беа соборени над регионите Белгород, Ростов и Ориол, соопшти Министерството.

Нападот со дрон предизвика пожар во складиште за гориво во Адигеја, соопшти регионалниот гувернер Мурат Кумпилов на „Телеграм“. Гувернерот на Тамбов, Максим Јегоров, рече дека претпоставениот напад со беспилотно летало запалил резервоар за гориво во регионот. Украина не даде никакви јавни изјави за тоа дали ги извршила нападите.

Во моментов нема коментари за веста. Биди прв да коментира...

Остави коментар