.webp){kind=icon}
Портокаловото ниво за опасност од високи температури останува активно денеска и утре затоа што, под влијание на многу топла воздушна маса од југ, времето ќе биде особено топло и дневната температура наместа ќе надминува 40 степени. Во Скопје максималната температура ќе достигне 41 степен.
Според прогнозата на Управата за хидрометеоролошки работи (УХМР), времето денеска ќе биде сончево и многу топло, попладне со мала до умерена локална облачност. Ќе дува слаб до умерен ветер од јужен правец. Минималната температура ќе биде во интервал од 12 до 23, а максималната ќе достигне од 35 до 41 степен. УВ-индексот ќе има вредност 9.
Во Скопје ќе биде сончево и многу топло, со слаб ветер од југоисточен правец. Минималната температура ќе се спушти до 20, а максималната ќе достигне 41 степен.
УХМР до крајот на оваа седмица прогнозира сончево и многу топло време, со мала до умерена локална облачност.
„Од четврток во попладневните и вечерните часови ќе има локална појава на нестабилност со пороен дожд и грмежи, особено во деновите од викендот, кога ќе има услови за изолирано невреме со интензивен пороен дожд, грмежи, силен ветер и град“, соопшти Управата за хидрометеоролошки работи.
Поради новиот топлотен бран во првите три дена од оваа работна седмица, до утре (14 август) важат препораките за намалување на ризиците од високите температури што ги усвои Владата на седница во неделата, по барање на Министерството за здравство.
