.webp){kind=icon}
Ако некогаш сте се посомневале дека вашиот пријател што е опседнат со крипто можеби е психопат, можно е и да не сте во заблуда.
Сопствениците на дигитални средства имаат тенденција да покажуваат повисоки нивоа на „мрачни“ особини на личноста, како нарцизам, макијавелизам, психопатија и садизам, според неодамнешен академски труд на истражувачите од Универзитетот во Торонто и Универзитетот во Мајами, објавен во списанието „Плос уан“ (PLOS One).
Добро утро, ова се петте вести кои се важни за почеток на денот.
Почнува циклусот на есенско монетарно олеснување – какви потези ќе влече НБРМ?
Во земјава каматната стапка на благајничките записи изнесува 6,30 отсто и не е променета цела година. На последниот состанок на Извршниот одбор на банката во јули политиката беше задржана поради потребата од стабилизирање на инфлацијата и инфлациските очекувања на потрајна основа. Имено, првото забавување на стапката беше забележано во јуни.
Следниот состанок на Извршниот совет за монетарна политика на НБРМ ќе се одржи на 17 септември. Дотогаш, членовите на советот ќе ги имаат пред себе податоците за августовската инфлација и податокот за движењето на БДП во првата половина од годината.
Газдите на ЕДС се шират во Романија
Грчкото јавно претпријатие за електрична енергија, фирма мајка на македонската компанија ЕДС („Енерџи деливери солушнс“) ќе се шири во Романија. Минатата недела вакво известување добила Комисијата за заштита на конкуренцијата.
Комисијата извести дека грчкото јавно претпријатие ќе стекне единствена контрола директно над друштвата: „Феликс рењувабл холдингс“, „ТМК хидроенерџи пауер“ и индиректна контрола над „Овидиу девелопмент“, „Томис тим“ и „М.В. тим инвест“, сите од Романија.
Финска ќе им забрани на Русите да купуваат имот на нејзина територија
Финска ги обелодени плановите за целосна забрана за стекнување имот од страна на некои странски државјани, бидејќи се појавија безбедносни грижи поради аквизиции со врски со Русија во близината на критичната инфраструктура.
Министерот за одбрана Анти Хаканен во понеделникот го претстави предлогот да се спречат Русите да вршат какви било купувања во нордиската членка на НАТО што ја дели најдолгата копнена граница на блокот со неговиот главен противник. Пред крајот на годината се очекува да биде доставен предлог-закон до Собранието.
Турција сака да влезе во БРИКС во обид да добие сојузници и надвор од Западот
Турција официјално побара да ѝ се приклучи на групата БРИКС (BRICS) составена од држави со пазари во развој, бидејќи се обидува да го зајакне своето глобално влијание и да создаде нови врски надвор од нејзините традиционални западни сојузници, според извори запознаени со ова прашање.
Ставот на администрацијата на претседателот Реџеп Таип Ердоган е дека геополитичкиот центар на гравитација се оддалечува од развиените економии, според упатените, кои зборуваа под услов да останат анонимни бидејќи не се овластени да коментираат.
Сопственикот на Тикток се задолжува 9,5 милијарди долари
„Бајтденс“ (ByteDance), кинеската компанија што е сопственик на Тикток (TikTok), преговара со банките за заем од 9,5 милијарди долари, што би било најголемиот корпоративен заем во долари во Азија (со исклучок на Јапонија), изјавија за „Блумберг“ (Bloomberg) извори запознаени со ситуацијата во компанијата.
„Ситигруп“ (Citigroup), „Голдман Сакс“ (Goldman Sachs) и „ЏП Морган“ (JPMorgan) ќе го координираат задолжувањето, а рокот на заемот ќе биде три години, со можност за продолжување на пет години, додадоа изворите, кои сакаа да останат анонимни бидејќи информацијата сè уште не е објавена.
