.webp){kind=icon}
„Фолксваген“ најави потег без преседан, планира затворање на две фабрики во Германија поради намалената продажба. Доколку дојде до затворање на објектите, синдикатите ќе повикаат на штрајк во октомври. Штрајкот би бил поддржан од половина милион работници.
Поради турбуленциите во германскиот гигант, властите во Берлин се одлучија за дополнителни даночни олеснувања за електричните автомобили за периодот од 2024 до 2028 година. Вестите за проблемите во „Фолксваген“ се само уште една во низата грижи за германскиот канцелар Шолц, кој во неделата беше казнет на регионалните избори во источниот дел на земјата.
Неделава продолжија проблемите на уште еден гигант. „Енвидија“ оди на суд поради сомнеж за монопол. Веднаш по судската покана, шефот на компанијата загуби 10 милијарди долари. Ова е досега најголем дневен пад на лично богатство.
Прочитајте повеќе:
На краток рок шопингот лекува, на долг - среќата не се купува
Драстични разлики во цените на храната во македонските градови
Во земјава, германската компанија БМЗ, лидер во производство на литиум-јонски батерии, почна со изградба на објект во Скопје за проширување на производството. Новата фабрика ќе има 40 производствени линии наместо сегашните пет. Цената на батериите годинава е во слободен пад, но власта верува дека БМЗ ќе придонесе за зголемување на извозот.
Извозот годинава паѓа, покажуваат податоците за движењето на економијата во вториот квартал. БДП во периодот април-јуни се зголеми за 2,3 отсто, што е забрзување во однос на претходниот период.
Податокот за економската активност е еден од тие што ги чека Народната банка, која во текот на септември треба да ја разгледа монетарната политика. Референтната камата во земјава изнесува 6,3 отсто и не е променета цела година, па сега се поставува прашањето дали извршниот одбор на централната банка ќе ги следи потезите на Европската централна банка.
Состанокот на ЕЦБ ќе се одржи една недела пред тој на НБРМ и извесно е уште едно намалување на каматата во еврозоната. Сепак, сѐ погласни стануваат препораките за побавно олабавување на политиките. Познавачите се согласни дека и во Европа и во САД процесот на намалување на каматите ќе стане потежок и тие ќе паднат до три отсто.
Прочитајте повеќе:
Кој е рецептот за европски плати во Македонија?
Во базенот невработени нема лица кои им требаат на македонските фирми
На пазарот со суровини, ОПЕК+ е блиску до договор за одложување на планираното зголемување на производството на нафта откако цените паднаа поради кревката побарувачка.
Златото ги има своите пет минути. Цената достигна нов рекорд во која било главна валута во одреден момент годинава. Стандардна златна прачка за првпат забележа вредност од повеќе од милион долари.
Прочитајте повеќе:
Величковиќ од „Гугл дип мајнд“ за ББА: ВИ може многу, ама е далеку од Ајнштајн
Побавниот економски раст во Кина ќе го одложи очекуваниот скок на цените на бакарот, велат аналитичарите од „Голдман Сакс“ (Goldman Sachs Group Inc.), кои исто така ги намалија проекциите за цената на бакарот за речиси 5.000 долари за тон.
Како што доаѓа зимата така расте и стравот за цената на гасот. Европа е доволно снабдена со резерви, но дали тие ќе бидат доволни ќе зависи од тоа колку зимата ќе биде остра и што ќе се случи по истекот на договорот меѓу Киев и Москва за доток на руски гас до Централна Европа преку Украина. Договорот истекува на крајот на годинава.
