Флорида се подготвува за една од најсилните тропски бури во последните сто години. Ураганот Милтон се движи кон брегот на САД, а властите ги повикуваат жителите веднаш да се евакуираат.
Милтон повторно се засили до категорија 5 и може да биде најсилната бура што ја погодила Флорида. Иако се прогнозира дека ќе ослабне пред да го погоди копното, ќе порасне во големина, што значи дека неговите катастрофални влијанија ќе се почувствуваат на поширока област. Доцна денеска се очекува невремето да стигне до брегот на Флорида.
Претседателот Џо Бајден ги предупреди жителите на Флорида да се евакуираат веднаш пред ураганот, велејќи дека ситуацијата е „прашање на живот и смрт“. Градоначалникот на Тампа ги предупреди жителите да „бегаат или ќе умрат“.
Белата куќа објави дека Бајден ја откажал планираната посета на Германија и на Ангола за да ги надгледува подготовките за Милтон, како и напорите за закрепнување од неодамнешниот ураган Хелен.
Милтон носи екстремно силни ветрови до 250 км/ч. откако ќе помине по северниот раб на полуостровот Јукатан во Мексико. Се прогнозира дека невремето со полна сила ќе ја погоди густо населената област Тампа Беј вечерва, помалку од две недели откако ураганот Хелен веќе ја опустоши државата. Жителите на Флорида добија совет да се подготват за најголемата евакуација во последните години.
Во тек е масовна евакуација. Десетици илјади луѓе ги блокираа патиштата и заглавија во сообраќајот.
Гувернерот Рон Десантис истакна дека Флорида отворила десетици засолништа за оние што не можат да ја напуштат областа погодена од невремето.
„Имаме едно засолниште што може да прими 10.000 луѓе. Другите засолништа можат да примат илјадници. Овие засолништа се последното прибежиште“, изјави тој на брифинг со новинарите.
Аеродромите во Тампа и во Орландо најавија дека ќе ги прекинат летовите со приближувањето на бурата.
.webp){kind=icon}
Во моментов нема коментари за веста. Биди прв да коментира...