Американските и француските власти го осудија упадот на приврзаниците на екстремната десница во државните институции во Бразил.
Белата куќа го осуди „обидот да се поткопа демократијата во Бразил“ и додаде дека американскиот претседател Џо Бајден внимателно ја следи ситуацијата и ги поддржува бразилските демократски институции.
Францускиот претседател Емануел Макрон повика на почитување на демократските институции и ја истакна својата „непоколеблива поддршка“ за бразилскиот претседател Луис Инасио Лула да Силва.
Прочитајте повеќе: Како политиката го „извалка“ славниот бразилски жолт дрес
„Мора да се почитува волјата на бразилскиот народ и демократските институции. Претседателот Лула може да смета на непоколебливата поддршка од Франција“, напиша Макрон на Твитер.
Француското МНР соопшти дека упадот на приврзаниците на екстремната десница е „неприфатливо преиспитување на резултатите од претседателските избори“ на кои Лула го победи Болсонаро.
Поддржувачите на бразилскиот екстремно десничарски поранешен претседател Жаир Болсонаро претходно упаднаа во Конгресот и Врховниот суд и ја опколија претседателската палата.
Многумина го споредија инцидентот со упадот во американскиот Капитол на 6 јануари 2021 година, од страна на поддржувачите на Доналд Трамп, кој инаку го поддржува Болсонаро.
Приврзаниците на Болсонаро, кои одбиваат да прифатат дека тој ги загуби изборите, ги пробија полициските бариери во главниот град Бразилија.
Тие побараа воена интервенција и оставка од Силва.
Поранешниот бразилски претседател, по вчерашните немири, се огласи на Твитер, каде што напиша дека „нападите и уништувањето јавни објекти“ се во спротивност со правото на мирен протест.
Во друг твит Болсонаро, кој се наоѓа во САД, ги отфрли „недокажаните обвинувања“ на неговиот наследник Лула, дека за „фашистичкиот вандализам“ е виновна токму неговата реторика.
И партијата на поранешниот претседател ги осуди постапките на неговите приврзаници, јави ДПА.
„Денеска е тажен ден за бразилската нација. Денешните настани во Бразил се срам за сите нас, тие не ја претставуваат нашата партија, тие не го претставуваат Болсонаро“, изјави лидерот на Либералната партија, Валдемар Кошта Нето.
.webp){kind=icon}
