.webp){kind=icon}
Лидерите на политичките партии на одржаната лидерска средба постигнале договор изборите следната година да се одржат на 8 мај, првиот круг на претседателските избори да се одржи на 24 април, додека вториот круг од претседателските избори и парламентарните избори да бидат на 8 мај.
Ова го соопшти премиерот и лидер на СДСМ Димитар Ковачевски во изјавата за медиумите по лидерската средба во Собранието.
„Задоволен сум што конечно ќе имаме редовни парламентарни избори од 2006 година. Мораме да внимаваме и на верските празници. Предложив првиот круг на претседателските избори да се одржи на 24 април а вториот круг на 8 мај заедно со парламентарните избори. Техничката влада ќе се формира на 28 јануари.“, изјави Ковачевски.“
Премиерот Ковачевски истакна дека уставните измени остануваат обврска на следниот парламентарен состав.
И лидерот на ВМРО-ДПМНЕ, Христијан Мицкоски, по завршувањето на лидерската средба потврди дека е договорен датум за избори.
„Се согласивме првиот круг да биде 24 април, а вториот круг на 8 мај. Сакам да апелирам до македонската јавност, до граѓаните, претстои сложен период, период на кампања. Ова ќе бидат избори во кои сите ние треба да одлучиме во каква Македонија и какво општество треба да живееме“, изјави Мицкоски.
На лидерската средба присуствуваа лидерот на ДУИ Али Ахмети, на Алијансата на Албанците Арбен Таравари, лидерите од Европскиот сојуз за промена Изет Меџити, Билал Касами, Африм Гаши, на НСДП Горан Мисовски, на ДОМ Маја Морачанин, на ВМРО-ДПМНЕ Христијан Мицкоски на Демократскиот сојуз Павле Трајанов.
Денешната лидерска средба пак порано ја напушти албанската опозиција, односно Европскиот сојуз за промени составен од Демократското движење, Беса и Алтернатива, бидејќи како што истакнаа по завршувањето на средбата, немало со кого да ги соочат аргументите.
