„Европската Унија отвори постапка за прекршување на социјалната мрежа Х на Илон Маск, порано позната како Твитер“, објави во понеделникот европскиот комесар за внатрешен пазар Тиери Бретон. Одлуката е донесена поради наводно прекршување на обврските на Х во однос на транспарентноста и должноста за борба против незаконски содржини и дезинформации. На европскиот регулатор му пречи и наводниот „залажувачки“ дизајн на корисничкиот интерфејс, јавуваат странските медиуми.
„Европската комисија започна формална постапка за прекршување против компанијата два месеца откако беше предупредена за нејзиното лошо управување со штетната содржина на страницата“, наведе Бретон преку објава на мрежата Х.
Европскиот закон за дигитални услуги ѝ дава на ЕУ нови овластувања да преземе мерки против големите технолошки компании што безгрижно се справуваат со содржината на нивните платформи. Компаниите што нема да ги почитуваат правилата може да се соочат со парична казна до шест отсто од годишниот приход, па дури и исклучување од европскиот пазар доколку постојано ги прекршуваат правилата.
Официјалната постапка за прекршување беше започната токму според Законот за дигитални услуги „врз основа на досега спроведената прелиминарна истрага, вклучувајќи ја и анализата на извештајот за процена на ризикот што го доставивме до мрежата Х во септември“. Меѓу другото, предупредувањата се однесуваат на ширење незаконски содржини во контекст на терористичките напади на Хамас врз Израел, се наведува во соопштението на ЕУ.
Комисијата ќе продолжи со собирање докази и по поведувањето на постапката. Законот за дигитални услуги инаку не одредува законски рок за завршување на формалните процедури.
.webp){kind=icon}