Акциите на „Спејс екс“ (SpaceX) пораснаа трет ден по ред и во вторникот ја надминаа пазарната вредност на „Амазон“ (Amazon), со што компанијата на Илон Маск стана петта највредна јавно тргувана компанија во светот. На крајот од тргувањето акциите забележаа раст од 4,8 проценти, што ја зголеми пазарната капитализација на компанијата на 2,65 билиони долари, околу осум милијарди долари повеќе од „Амазон“.
Во текот на денот „Спејс екс“ накратко го престигна и „Мајкрософт“, достигнувајќи позиција на четврта највредна компанија во светот според пазарна капитализација.
Аналитичарите посочуваат дека значителен дел од растот е поттикнат од ограничениот број акции достапни за тргување. Само околу 4,2 проценти од вкупните акции на компанијата се во слободен промет, што создава услови за изразена волатилност и големи ценовни осцилации.
Од дебито на берзата, акциите на „Спејс екс“ пораснаа за 49 проценти во однос на почетната цена од 135 долари, што укажува на силна побарувачка од инвеститорите и ги намалува стравувањата дека рекордната јавна понуда ќе биде преголем товар за пазарот.
Bloomberg
Дополнителен поттик за инвеститорскиот интерес донесе и објавата дека „Спејс екс“ постигнал договор за преземање на стартапот „Курсор“ (Cursor), специјализиран за алатки за програмирање базирани на вештачка интелигенција, во трансакција што ја вреднува компанијата на 60 милијарди долари.
Значајна улога во растот на акцијата имаат и малите инвеститори. Според податоци на ВР (Vanda Research), во првите два дена од тргувањето тие купиле акции на „Спејс екс“ во обем еднаков на вкупните купувања на американскиот пазар на акции во текот на претходната недела.
И покрај огромната пазарна вредност, финансиските показатели на компанијата остануваат далеку зад оние на најголемите технолошки гиганти. „Спејс екс“ во 2025 година остварил приходи од 18,7 милијарди долари, додека „Мајкрософт“ пријавил приходи од 281,7 милијарди долари, а „Амазон“ речиси 717 милијарди долари.
Bloomberg
Во вторникот започна и тргувањето со опции на акциите на „Спејс екс“ на повеќе американски берзи, потег што може дополнително да ја зголеми нестабилноста на цената. Само во првиот ден биле истргувани повеќе од 1,6 милиони опциски договори, што укажува на силни очекувања за натамошен раст.
Пазарните учесници внимателно ја следат и можноста за брзо вклучување на „Спејс екс“ во берзанските индекси на Nasdaq. Таков потег би можел да создаде дополнителна побарувачка, бидејќи индексните фондови ќе мора да купуваат акции на компанијата. Од друга страна, „Спејс екс“ нема веднаш да биде вклучена во индексот S&P 500 поради постојните правила за новолистирани компании.
Сепак, дел од аналитичарите предупредуваат дека вистинскиот тест за вредноста на акцијата ќе дојде по објавувањето на резултатите за вториот квартал, кога ќе почнат да истекуваат првите ограничувања за продажба на акции од страна на раните инвеститори и вработените. Со зголемувањето на понудата на пазарот, инвеститорите ќе добијат појасна слика за реалната пазарна цена на компанијата.
.webp){kind=icon}
