Трамп е подобар избор за американската економија, покажува анкета на „Фајненшл тајмс“

Повеќе Американци веруваат дека Доналд Трамп може да ја подобри нивната економија отколку сегашниот претседател Џо Бајден, покажува ново истражување спроведено од „Фајненшл тајмс“.

Резултатите од истражувањето покажуваат дека 42 отсто од граѓаните на САД сметаат дека Трамп би бил подобар кандидат што се однесува до економијата, додека 31 отсто од Американците се задоволни од работата на Бајден. Малку повеќе од една петтина од испитаниците изјавиле дека не веруваат ниту во способностите на Бајден, ниту на Трамп, според истражувањето спроведено од „Фајненшл тајмс“ во соработка со Универзитетот во Мичиген.

Месечните анкети (чие спроведување започна во ноември) имаат за цел да го следат расположението на американските гласачи до доаѓањето на претседателските избори закажани за ноември годинава.

Трамп сè уште води по овие параметри, иако анкетираните Американци исто така рекле дека нивната финансиска состојба е подобрена во последните 30 дена, а зголемени се и проекциите на населението за состојбата на економијата.

Анкетата е спроведена од 2 до 5 февруари преку интернет, а во неа учествувале 1.006 луѓе. Оваа анкета има маргина на грешка од 3,1 процентен поен.

Во моментов нема коментари за веста. Биди прв да коментира...

Остави коментар