Моди положи заклетва за трет мандат како премиер на Индија

Нарендра Моди во неделата положи заклетва трет последователен мандат како премиер на Индија. Откако неговата хинду националистичка БЈП (Бхаратија Џаната партија) не успеа да освои апсолутно парламентарно мнозинство, тој ќе мора да се потпре на коалициските партнери за власт.

Моди положи заклетва на церемонијата со која претседаваше претседателот Друпади Мурму во индиската претседателска палата Раштрапати Баван во Њу Делхи.

Овој популарен 73-годишен лидер е само вториот индиски премиер, по Џавахарлал Нехру, што остана на власт трет петгодишен мандат. Ова е првпат БЈП, за време на владеењето на Моди, да има потреба од поддршка од сојузниците за да формира влада, откако освои убедливо мнозинство во 2014 и 2019 година.

Поголемиот дел од населението на Индија е хинду – дури 80 отсто од нејзините 1,4 милијарда жители. Поддржувачите на Моди му припишуваат заслуги за брзиот економски раст и подобрувањето на позицијата на Индија на светската сцена.

Но неговите критичари велат дека тој ги поткопува индиската демократија и нејзиниот статус како секуларна нација со хинду националистички напади врз малцинствата во земјата, особено муслиманите, и ги намалува просторот за несогласување и слободата на медиумите. Неговите политички противници исто така ги доведуваат во прашање економските резултати, укажувајќи на високата невработеност и зголемената нееднаквост и покрај силниот економски раст.

Победата на Моди е помалку убедлива од очекуваното. Откако прелиминарните резултати покажаа дека на владејачката партија ќе ѝ биде потешко да добие мнозинство во парламентот отколку што се мислеше, акциите на компаниите поврзани со владините цели паднаа. Рупијата ослабе во однос на доларот најмногу во последните 10 месеци, а приносот на 10-годишната обврзница порасна за 11 базични поени, што е најголем дневен скок од октомври.

Во моментов нема коментари за веста. Биди прв да коментира...

Остави коментар