Бајден повтори дека нема намера да се повлече од претседателската трка

Американскиот претседател Џо Бајден повтори дека „нема намера да замине“ соочен со на повиците од многу демократи да ја прекине својата кандидатура за реизбор.

Тој ја искористи прославата на Денот на независноста за да возврати на сомневањата за неговата издржливост и остроумност.

На настанот едно лице од публиката извика кон американскиот претседател: „Продолжете да се борите! Ни требате!“, а тој му одговори: „Можете да сметате на мене. Немам намера да заминам“, повторувајќи го своето ветување дека ќе остане во трката и покрај зголемените повици за негово повлекување.

Бајден минатата недела имаше катастрофален настап на дебатата со Доналд Трамп. Беше збунет, нефокусиран, на моменти зборуваше како да нема поим за која тема станува збор. Американската јавност со години дебатира дали 81-годишниот претседател е во психофизичка состојба да ја води најголемата светска сила. Дебатата ги продлабочи дискусиите што воопшто не се во корист на Бајден.

Многу демократи последните денови јасно ставија до знаење дека Бајден мора да се повлече за да може ново лице навреме да се соочи со Трамп, кој води според анкетите.

Џо Бајден им кажал на соработници и на лидери на Демократската партија дека посетил лекар по неговите лоши резултати на минатонеделната дебата со Доналд Трамп, што е спротивно на претходните изјави од Белата куќа за неговата медицинска нега, пренесува Ен-би-си.

Тој во средата се состанал со демократските гувернери и се соочил со прашања за разочарувачкиот настап на дебатата. На прашањето дали добил медицинска помош по дебатата, тој пред гувернерите признал дека бил прегледан од лекар и оти сè е во ред, тврдат два изворa на Ен-би-си.