.webp){kind=icon}
Русија ги ослободува новинарот на „Волстрит журнал“ (Wall Street Journal) Еван Гершкович и поранешниот американски маринец Пол Вилан, како дел од голема размена на затвореници со САД, според луѓе запознаени со ситуацијата.
Мажите, затворени во Русија под обвинение за шпионажа, кое тие и САД го негираат, се на пат кон дестинации надвор од Русија. Според договорот САД и нивните сојузници, во Русија ќе вратат затвореници што ги држат на своја територија, рекоа лицата, барајќи анонимност бидејќи станува збор за информации што сè уште не се јавни.
Грешкович (32) беше уапсен во март минатата година додека известувал од градот Екатеринбург во Урал и обвинет за шпионирање за ЦИА, што тој го негираше.
На 19 јули годинава беше осуден невообичаено брзо на 16 години затвор по обвиненијата за шпионажа. Тоа е прв случај по Студената војна Русија да му суди на американски новинар за шпионажа.
Вилан, кој беше приведен во 2018 година, беше осуден на 16 години во 2020 година поради обвиненијата за шпионирање што тој ги негираше.
Дополнителни детали за размената не беа веднаш достапни. САД со години водат разговори за ослободување на двете лица, кои Стејт департментот ги нарече погрешно приведени.
Портпаролот на Кремљ, Дмитриј Песков, денеска одби да даде коментар за тврдењата на медиумите дека се подготвува голема размена на затвореници помеѓу Русија и Белорусија, од една страна, и САД, Германија, Словенија и Велика Британија, од друга страна.
